სომხეთში რამდენიმე საზოგადოებრივმა და პოლიტიკურმა ძალამ ხელისუფლებას მოუწოდა დაუყოვნებლივ დაიწყოს რუსეთთან დაკავშირებული ორგანიზაციებიდან გასვლის პროცესი და ევროკავშირში გაწევრიანებაზე განაცხადი შეიტანოს.
პოლიტიკურმა გაერთიანებებმა ამის შესახებ განცხადება დამოუკიდებლობის ფორმუზე გააკეთეს.
განცხადების ავტორებმა დაგმეს „რუსეთისა და აზერბაიჯანის მუქარა სომხეთის დამოუკიდებლობისა და ტერიტორიული მთლიანობის მიმართ“ და მოუწოდეს სომხეთის ხელისუფლებას დატოვონ კოლექტიური უსაფრთხოების ხელშეკრულების ორგანიზაცია (ოდკბ), ევრაზიის ეკონომიკური კავშირი (EAEU) და დამოუკიდებელ სახელმწიფოთა თანამეგობობა (დსთ).
„დღეს, რუსეთის ხელისუფლების მიერ გატარებული ანტისომხური პოზიცია და პოლიტიკა, რომლის მსხვერპლი იყო არცახის {მთიანი ყარაბაღის} სომეხი მოსახლეობა, მიუღებელია და კიდევ უფრო აღრმავებს უფსკრულს, რომელიც წარმოიშვა სომხეთსა და რუსეთს შორის ბოლო წლებში, რაც მას ფაქტობრივად, გადაულახავს ხდის და სომხეთის რესპუბლიკასა და რუსეთის ფედერაციას შორის არსებული მთელი საკანონმდებლო ბაზის რადიკალური გადახედვის გადაუდებელ აუცილებლობას ქმნის“, - ნათქვამია მიმართვაში.
განცხადების ავტორები „არცახელი სომხების იძულებით დეპოტრიაციას შიმშილისა და სამხედრო აგრესიის გზით“, განიხილავენ იმავე ჭრილში, როგორც „რუსეთის აგრესიას და გენოციდს უკრაინელი ხალხის წინააღმდეგ“.
ორგანიზაციები და კერძო პირები, მიესალმებიან სომხეთის ხელისუფლების მზადყოფნას მოახდინოს სისხლის სამართლის საერთაშორისო სასამართლოს რომის სტატუტის რატიფიცირება და მოუწოდებენ ეს ყოველგვარი დათქმების გარეშე გააკეთოს.
მათ ასევე მოუწოდეს სომხეთის ხელისუფლებას დაარღვიოს ყველა სამხედრო და ეკონომიკური შეთანხმება რუსეთის ფედერაციასთან და აკრძალოს რუსული სახელმწიფო სატელევიზიო არხების მაუწყებლობა.
განცხადების ავტორები ასევე მოუწოდებენ ხელისუფლებას, მიმართოს ევროკავშირს სრულუფლებიან გაწევრიანებასთან დაკავშირებით, ხელი მოაწეროს ორმხრივ სტრატეგიულ პარტნიორობის შეთანხმებებს ევროკავშირის წევრ ქვეყნებთან, შეერთებულ შტატებთან, კანადასთან, ინდოეთთან და დასავლეთის სხვა დემოკრატიულ ქვეყნებთან. ასევე გადადგას ნაბიჯები ორმხრივი და მრავალმხრივი სამხედრო თანამშრომლობის გაღრმავების მიზნით დასავლეთისა და ევროატლანტიკურ ქვეყნებთან.
