აშშ-ის სახელმწიფო მდივანი ენტონი ბლინკენი, შესაძლოა მთიანი ყარაბაღის კონფლიქტის დიპლომატიური გზით გადაჭრის მცდელობაში ჩაერთოს და სომხეთსა და აზერბაიჯანს შორის შუამავალი გახდეს. ამის შესახებ სახელმწიფო დეპარტამენტში განაცხადეს.
მანამდე ბლინკენმა გაავრცელა განცხადება, რომელშიც აღნიშნულია, რომ ამერიკის შეერთებული შტატები ღრმად შეშფოთებულია აზერბაიჯანის სამხედრო მოქმედებებით მთიან ყარაბაღში და მოუწოდებს აზერბაიჯანს, დაუყოვნებლივ შეწყვიტოს ეს ქმედებები.
„ეს ქმედებები აუარესებს ისედაც მძიმე ჰუმანიტარულ მდგომარეობას მთიან ყარაბაღში და ძირს უთხრის მშვიდობის პერსპექტივებს. როგორც ადრე აზერბაიჯანთან აღვნიშნეთ, ძალის გამოყენება დავების გადასაჭრელად მიუღებელია და ეწინააღმდეგება რეგიონში სამართლიანი და ღირსეული მშვიდობის პირობების შექმნის მცდელობებს. მოწოდებით გამოვდივართ, რომ სასწრაფოდ შეწყდეს საომარი მოქმედებები და დაიწყოს ბაქოსა და მთიანი ყარაბაღის მოსახლეობის წარმომადგენლებს შორის პატივსაცემი დიალოგი“, – ნათქვამია ენტონი ბლინკენის განცხადებაში.
19 სექტემბერს, აზერბაიჯანულმა მხარემ განაცხადა, რომ ყარაბაღში ლოკალური ხასიათის „ანტიტერორისტული ღონისძიებები“ დაიწყო.
აზერბაიჯანის თავდაცვის სამინისტროს განცხადებით, „სომხეთის შეიარაღებული ძალების ფორმირებების მიერ აზერბაიჯანის არმიის პოზიციების სისტემატური დაბომბვა ყარაბაღის რეგიონში, ტერიტორიების განგრძობადი დანაღმვა, სამუშაოების ჩატარება საინჟინრო, საბრძოლო პოზიციების გასაუმჯობესებლად, აგრეთვე სანგრების რაოდენობის გაზრდა ბოლო თვეებში კიდევ უფრო დიდი დაძაბულობის მიზეზი გახდა“.
თავის მხრივ სომხეთის თავდაცვის სამინისტრომ განაცხადა, რომ სომხეთის რესპუბლიკას მთიან ყარაბაღში არმია არ ჰყავს განუთავსებია.
