ორმა სატვირთო გემმა, რომლებიც იყენებდნენ ახალ დროებით მარშრუტს შავი ზღვის გავლით, წარმატებით მიაღწიეს უკრაინის პორტებს. იუწყება უკრაინული მედია.
პალაუს დროშის ქვეშ მცურავი თურქული ტვირთმზიდი Aroyat, შაბათს საღამოს დაახლოებით ექვს საათზე შევიდა ოდესის ოლქის „ჩერნომორსკის“ პორტში, პალაუს დროშის ქვეშ მცურავი მეორე გემი Resilient Africa კი პორტის წყლებში დაახლოებით 22 საათზე შევიდა. ორივე მათგანი პირველი სამოქალაქო გემებია ომის დაწყების შემდეგ, რომლებმაც მარცვლეულის დერეფნის გარეშე მიაღწიეს ოდესის რეგიონის პორტს.
კიევმა შავ ზღვაში დროებითი დერეფნის გახსნის შესახებ მას შემდეგ განაცხადა, რაც რუსეთმა „მარცვლეულის შეთანხმება“ დატოვა, რომელიც მიზნად ისახავდა უკრაინის პორტებიდან მარცვლეულის ტრანსპორტირების უსაფრთხო ნავიგაციას.
ამ მარშრუტით ადრე სარგებლობდა რამდენიმე სატვირთო გემი, რომლებიც ბლოკირებული იყო უკრაინის პორტებში გასული წლის თებერვლიდან.
იმის გამო, რომ მთელ მარშრუტზე რჩება საფრთხე რუსული სამხედროებისა და მცურავი ნაღმების მხრიდან, კაპიტანმა ან მფლობელმა ოფიციალურად უნდა დაადასტუროს მზადყოფნა სახიფათო პირობებში ნაოსნობისთვის.
ის, რომ სატვირთო გემების ეკიპაჟმა დაადასტურა მზადყოფნა მარშრუტით სარგებლობისთვის, უკრაინის ინფრასტრუქტურის მინისტრმა ოლექსანდრ კუბრაკოვმა შაბათს შუადღისას განაცხადა.
მისი თქმით, ამ გემებმა უკრაინის პორტიდან აზიისა და აფრიკის ქვეყნებისთვის 20 ტონამდე ხორბალი უნდა გაიტანონ.
