ჩვენ ვხედავთ, რომ ქვეყნის შიგნიდან და გარედან, პრეზიდენტზე მიდიოდა და მიდის პირდაპირი ზეწოლა შეწყალების გამოყენებაზე, – ამის შესახებ განაცხადა პარლამენტის თავმჯდომარემ, შალვა პაპუაშვილმა საქართველოს პირველი არხის გადაცემაში „აქტუალური შაბათი – მაკა ცინცაძესთან ერთად“.
„ვნახეთ, რომ ნიკა გვარამიას შეწყალება იყო პირდაპირი ზეწოლის შედეგი. მართალია, პრეზიდენტი არ აღიარებს, მაგრამ მან თქვა, რომ ის განმარტების გაკეთებას არ აპირებს ქართველი ხალხის წინაშე და შემდეგ აღმოვაჩინეთ, რომ ამ შეწყალება თურმე უთანხმებდა ევროპარლამენტის წევრებს. მათ თავად თქვეს, რომ წინასწარ იცოდნენ, პრეზიდენტი ნიკა გვარამიას რომ იწყალებდა. ქართველმა ხალხმა ეს არ იცოდა და ევროპარლამენტის რომელიღაც წევრმა იცოდა“, – განაცხადა პაპუაშვილმა.
გადაცემის წამყვანის შეკითხვაზე, ელოდება თუ არა პრეზიდენტის მიერ მიხეილ სააკაშვილის შეწყალებას, შალვა პაპუაშვილმა განაცხადა, რომ ზეწოლა დიდია და ამისთვის ფული იხარჯება.
„ცხადი ისტორიაა, რასაც ვუყურებთ, რომ მიდის ზეწოლა არა მხოლოდ პრეზიდენტზე, არამედ სხვადასხვა შტოზე. ვნახეთ, რომ ამაში ფულია გადახდილი. ამერიკაში არსებული ე.წ რუსული კანონის წყალობით გავიგეთ, რომ ფული იხარჯება იმისთვის, რათა მოისყიდონ პოლიტიკოსები, ევროპარლამენტს შეუცურონ რეზოლუციის ტექსტები და ა.შ“, – განაცხადა შალვა პაპუაშვილმა.
