პოლონეთმა, ბალტიისპირეთის ქვეყნებისა და ფინეთის შემდეგ, რუსეთში რეგისტრირებულ მანქანების შესვლა აკრძალა. ამის შესახებ განაცხადა პოლონეთის შინაგან საქმეთა მინისტრმა მარიუშ კამინსკიმ.
კამინსკის თქმით, აკრძალვა გავრცელდება რუსეთში რეგისტრირებულ ყველა ავტომობილზე, განურჩევლად გამოყენების მიზნისა და მისი მფლობელის მოქალაქეობისა.
„წესი ასეთია: რუსეთში რეგისტრირებულ მანქანას პოლონეთში შესვლის უფლება არ აქვს“, - თქვა მან. მინისტრმა გაიხსენა, რომ მსგავსი აკრძალვა რუსულ სატვირთო მანქანებზე მიმდინარე წლის ივნისიდან ამოქმედდა. პოლონეთს აქვს პირდაპირი საზღვარი რუსეთთან კალინინგრადის რეგიონში.
მანამდე ლატვიამ, ლიეტუვამ, ესტონეთმა და ფინეთმა რუსული სანომრე ნიშნის მქონე მანქანების შესვლა აკრძალეს.
სექტემბრის დასაწყისში ევროკომისიამ სანქციებთან დაკავშირებით ოფიციალური განმარტება გააკეთა, რომელშიც მან რუსეთში რეგისტრირებული მანქანების შესვლის აკრძალვა დაადასტურა.
ამასთან, ბალტიისპირეთის ქვეყნები განიხილავენ რუსული სანომრე ნიშნების მქონე მანქანების ჩამორთმევას, რომლებიც უკვე მათ ტერიტორიაზეა. ევროპის სასაზღვრო ქვეყნებიდან მხოლოდ ნორვეგიას, რომელიც ევროკავშირის წევრი არ არის, რუსეთში რეგისტრირებული მანქანებისთვის არ დაუწესებია შესვლაზე აკრძალვა.
