პოლონეთის განვითარებისა და ტექნოლოგიების მინისტრმა ვალდემარ ბუდამ პარასკევს ხელი მოაწერა განკარგულებას უკრაინიდან სასოფლო-სამეურნეო პროდუქტების, კერძოდ ხორბლის, სიმინდის, რაფსის და მზესუმზირის იმპორტის განუსაზღვრელი ვადით აკრძალვის შესახებ.
მინისტრმა ევროკომისიის გადაწყვეტილებას არ გააგრძელოს უკრაინული მარცვლეულის იმპორტზე ემბარგო მცდარი უწოდა და განმარტა, რომ ბრძანება ძალაში 16 სექტემბრის შუაღამედან შევა.
"პოლონელი ფერმერი უპირველესია!" – დასძინა ბუდამ და მადლობა გადაუხადა პოლონეთის სოფლის მეურნეობის მინისტრს რობერტ ტელუსს და ევროკომისარს სოფლის მეურნეობის საკითხებში იანუშ ვოიჩიეჩოვსკის, რომელიც პოლონეთის კვოტით არის დანიშნული.
როგორც ცნობილია, ევროკომისიამ დროებითი შეზღუდვა დააწესა უკრაინული სოფლის მეურნეობის პროდუქციის იმპორტზე ევროკავშირის ხუთ ქვეყანაში - პოლონეთში, ბულგარეთში, უნგრეთში, რუმინეთსა და სლოვაკეთში. ეს ქვეყნები ამტკიცებდნენ, რომ უკრაინული მარცვლეული გავლენას ახდენდა მათ ბაზარზე და ზიანს აყენებდა ფერმერებს.
თუმცა პარასკევს ევროკომისიამ განაცხადა, რომ არ გააგრძელებს შეზღუდვებს უკრაინიდან სოფლის მეურნეობის პროდუქციის იმპორტზე 15 სექტემბრის შემდეგ. ამასთან, კიევი დათანხმდა მიიღოს ზომები იმპორტის შეზღუდვის მიზნით.
ამის მიუხედავად, პოლონეთმა, უნგრეთმა და სლოვაკეთმა გადაწყვიტეს ცალმხრივი შეზღუდვების დაწესება.
