ბელარუსის პრეზიდენტმა, ალექსანდრ ლუკაშენკამ რუსეთის ლიდერს, ვლადიმირ პუტინს ჩრდილოეთ კორეასთან ერთად „სამეულის თანამშრომლობა“ შესთავაზა.
„სასიამოვნო იყო კიმ ჩენ ინთან ერთად თქვენი ნახვა აღმოსავლეთ კოსმოდრომზე. ჩვენ შეგვიძლია, ვიფიქროთ თანამშრომლობაზე ჩვენ სამს შორის – ჩრდილოეთ კორეა, რუსეთი“, – აღნიშნა ლუკაშენკამ პუტინთან შეხვედრისას.
თავის მხრივ, ვლადიმირ პუტინმა ლუკაშენკას ჩრდილოეთ კორეის ლიდერთან მოლაპარაკებების დეტალები გააცნო და აღნიშნა, რომ რუსეთი და ჩრდილოეთ კორეა საფრთხეს არავის უქმნის.
ბელარუსისა და რუსეთის ლიდერებს შორის შეხვედრა სოჭში გაიმართა. შეხვედრის მთავარი საკითხები უკრაინაში მიმდინარე ომი, ეკონომიკური თანამშრომლობა და წინა დღით კიმ ჩენ ინთან გამართული მოლაპარაკებები იყო.
დასავლელი ექსპერტების ცნობით, პუტინმა და კიმ ჩენ ინმა განიხილეს სამხედრო თანამშრომლობის საკითხი, კერძოდ, რუსეთისთვის ჩრდილოეთ კორეული საბრძოლო მასალის მიწოდების საკითხი უკრაინაში ომისათვის.
აშშ ფხენიანს დაემუქრა და განაცხადა, რომ რუსეთისთვის იარაღის მიწოდების შემთხვევაში ჩრდილეოთ კორეა მაღალ ფასს გადაიხდის.
