რვა პასუხისმგებელ უწყებას სამოქალაქო უსაფრთხოების სისტემაზე 47 შეკითხვით მივმართეთ 11 აგვისტოს, თუმცა არცერთ შეკითხვაზე პასუხი არ მიგვიღია, ვინაიდან ისინი მალავენ საკუთარ დანაშაულს, ამიტომ ჩვენ ამ უწყებებს ვიბარებთ სასამართლოში და ვთხოვთ პასუხებს კონკრეტულ კითხვაზე - თუ რატომ მიატოვეს შოვის ტრაგედიისას ადამიანები, სამი საათის განმავლობაში, - ამის შესახებ განაცხადა „ერთიანი ნაციონალური მოძრაობის“ პოლიტსაბჭოს წევრმა, ლაშა ფარულავამ
დღეს, თბილისის საქალაქო სასამართლოში, „ერთიანი ნაციონალური მოძრაობის“ პოლიტსაბჭოს წევრმა, ლაშა ფარულავამ შოვის სტიქიასთან დაკავშირებით სასამართლოში სარჩელი შეიტანა.
მისი განცხადებით, შოვის ტრაგედია პირდაპირ კავშირშია ირაკლი ღარიბაშვილის, ვახტანგ გომელაურის, ლევან დავითაშვილის დანაშაულებრივ უმოქმედობასთან და კორუფციულ ინტერესებთან.
„რაჭის სტიქია და შოვში ტრაგედიის მასშტაბები პირდაპირ კავშირშია ირაკლი ღარიბაშვილის, ვახტანგ გომელაურის, ლევან დავითაშვილის დანაშაულებრივ უმოქმედობასთან და კორუფციულ ინტერესებთან. სწორედ ამასთან დაკავშირებით ჩვენ რვა პასუხისმგებელ უწყებას სამოქალაქო უსაფრთხოების სისტემაზე 47 შეკითხვით მივმართეთ 11 აგვისტოს, თუმცა არცერთ შეკითხვაზე პასუხი არ მიგვიღია, ვინაიდან ისინი მალავენ საკუთარ დანაშაულს, ჩვენ ამ უწყებებს ვიბარებთ სასამართლოში, შეგვაქვს სარჩელი და მოვითხოვთ საჯარო ინფორმაციაზე პასუხებს კონკრეტულ კითხვაზე - თუ რატომ მიატოვეს ადამიანები შოვის ტრაგედიისას სამი საათის განმავლობაში.
ტრაგედიის მასშტაბები პირდაპირ კავშირშია მთავრობის დანაშაულებრივ უმოქმედობასთან. შედეგად მივიღეთ 32 დაღუპული, 2 დაკარგული. 2 ადამიანი კი სამძებრო-სამაშველო ღონისძიებების დროს გარდაიცვალა. ამაზე, რა თქმა უნდა, პასუხისმგებელი არის ირაკლი ღარიბაშვილი,“- განაცხადა ლაშა ფარულავამ.
