აუცილებელია, გურიის რეგიონში მყოფი მოსახლეობის უსაფრთხო ადგილას გადაყვანა, ამიტომ, მივმართავ ოჯახებს, მიჰყვნენ ადგილობრივი ხელისუფლებისა და შესაბამისი სამსახურების რეკომენდაციებს, – ამის შესახებ საქართველოს პრემიერ-მინისტრმა, ირაკლი ღარიბაშვილმა, მთავრობის დღევანდელ სხდომაზე განაცხადა და სტიქიის შედეგად დაღუპულთა ოჯახებს კიდევ ერთხელ მიუსამძიმრა.
ღარიბაშვილმა აღნიშნა, რომ ხელისუფლება ყველა ოჯახს მაქსიმალურად დაეხმარება.
„მინდა, საზოგადოებას მივაწოდო ინფორმაცია, რა გაკეთდა დღის მდგომარეობით. ჩემი დავალებით, მობილიზებულ იქნა ყველა სახელმწიფო უწყება. სტიქიური კერები იყო 22 ადმინისტრაციულ ერთეულში ოზურგეთში, ლანჩხუთში – 15. დღეის მდგომარეობით, ოზურგეთისა და ლანჩხუთის მუნიციპალიტეტების მასშტაბით, 11 ლოკაციაზე წერტილოვნად არის ავტომანქანით გადაადგილების შეზღუდვა.
სტიქიის პირველივე დღიდან გურიის რეგიონში სამაშველო ღონისძიებაში 200 მაშველი იყო ჩართული. ჯამში, უსაფრთხო ადგილზე გამოყვანილია 142 ადამიანი. გეოლოგების მიერ ორი დღის მანძილზე შემოწმდა 237 მოქალაქის საკარმიდამო ნაკვეთი და საცხოვრებელი სახლი, 31 ინფრასტრუქტურული ობიექტი და შეგუბების ცხრა უბანი“, – აღნიშნა ღარიბაშვილმა.
ამასთან, პრემიერ-მინისტრმა გურიის რეგიონში მყოფ მოსახლეობას მოუწოდა, გაითვალისწინონ ადგილობრივი ხელისუფლებისა და შესაბამისი სამსახურების რეკომენდაციები.
„სტიქიის ზონიდან ამ ეტაპზე განსახლებას დაექვემდებარა 105 ოჯახი. მინდა, მოწოდებითა და თხოვნით მივმართო ოჯახებს, რომ აუცილებელია ჩვენი რეკომენდაციების გათვალისწინება და აუცილებელია, მათი დროებით გადაყვანა უფრო უსაფრთხო ადგილას. ამიტომ, მივმართავ ოჯახებს, მიჰყვნენ ადგილობრივი ხელისუფლებისა და შესაბამისი სამსახურების რეკომენდაციებს“, – განაცხადა ირაკლი ღარიბაშვილმა.
ღარიბაშვილის თქმით, სასტუმროებში გადაყვანილია 110 მოქალაქე.
„ყველა ადმინისტრაციულ ერთეულთან ჩატარებულია ინტენსიური გაწმენდითი საუშაოები. აღდგენილია როგორც ფეხით, ისე ტრანსპორტით გადაადგილება. გაერთიანებული წყალმომარაგების კომპანიის მიერ ჩატარებული ინტენსიური სამუშაოების შედეგად, სასმელი წყალი ლანჩხუთისა და ოზურგეთის მუნიციპალიტეტების მოსახლეობას უკვე სრულად მიეწოდება. რაც შეეხება ელექტროენერგიას, პირველ დღეს ოზურგეთში გათიშული იყო 8 000 აბონენტი. დღეს სრულად აღდგენილია ყველა მათგანი, ხოლო ლანჩხუთში, სტიქიის დღეს გათიშული იყო 7 000 აბონენტი და დღეის მონაცემებით, დარჩენილია მხოლოდ 250 აბონენტი. დღის ბოლოს 200 აბონენტს აღუდგება ელექტროენერგია.
რეგიონებიდან მუნიციპალიტეტებისა და „ქართული ოცნების“ წარმომადგენლების მიერ შეგროვებული ჰუმანიტარული ტვირთი უკვე დაურიგდა 235 ოჯახს. პროცესი გაგრძელდება, სახელმწიფო მაქსიმალურად გვერდში დაუდგება ამ ოჯახებს. დავითვლით სტიქიის შედეგად მიყენებულ ზარალს და მაქსიმალურად დავეხმარებით ყველას, ვისაც ეს სტიქიური უბედურება შეეხო.
რაც შეეხება გაზს, სტიქიის პირველ დღეს ოზურგეთსა და ლანჩხუთში გათიშული იყო 3 627 აბონენტი. დღეის მდგომარეობით, ბუნებრივი აირი არ აქვს 791 აბონენტს. ახლა აქტიურად მიმდინარეობს გზის გაწმენდითი სამუშაოები სოფლებში. ამის შემდეგ კომპანია „სოკარი“ აღადგენს გაზის მიწოდებას.
ოზურგეთსა და ლანჩხუთში სტიქიის შედეგად ჯამურად დაზიანებულია 100 ხიდი და მილხიდი. ეს მდგომარეობაა. მობილიზებულია ყველა სახელმწიფო უწყება. მინდა, კიდევ ერთხელ მადლობა გადავუხადო ყველას, მაშველებს, ყველა კომპანიას, სახელმწიფო უწყებებს, ადგილობრივ ხელისუფლებას. ჩვენი დეპუტატები, პარლამენტის წევრები, პარტიის ხელმძღვანელობა ადგილზე იყვნენ ჩასული. ასე რომ, ჩვენ მაქსიმალურად გვერდში დავუდგებით ჩვენს ხალხს“, – განაცხადა ღარიბაშვილმა.
