უკრაინის პრეზიდენტი ვოლოდიმირ ზელენსკი დიდი ბრიტანეთის პრემიერ-მინისტრს რიში სუნაკს ტელეფონით ესაუბრა.
ამის შესახებ ზელენსკი ტვიტერში წერს.
მისი თქმით, სუნაკთან მარცვლეულის ექსპორტსა და უკრაინის სამხედრო საჭიროებებზე ისაუბრა.
„შავი ზღვის მარცვლეულის ექსპორტი. უკრაინამ წარმატებით გახსნა ალტერნატიული გზა და საჭიროებს პარტნიორების დახმარებას ოდესის ოლქის ჰაერსაწინააღმდეგო თავდაცვის გაძლიერებაში. მადლობა გადავუხადე დიდ ბრიტანეთს მტკიცე მხარდაჭერისთვის, კერძოდ, სამხედო მხარდაჭერისთვის“, - განაცხადა ზელენსკიმ.
ამასთან, ბრიტანეთის მთავრობის წარმომადგენელის თქმით, სუნაკმა დაარწმუნა ზელენსკი, რომ დიდი ბრიტანეთი განაგრძობს პროგრესს დიდი შვიდეულის ქვეყნებთან რუსეთის მიერ შავი ზღვის მარცვლეულის ბლოკადის დაძლევაში.
„პრეზიდენტმა ზელენსკიმ მიაწოდა ინფორმაცია უკრაინის კონტრშეტევაზე და ამჟამინდელ სამხედრო საჭიროებებზე, ხოლო პრემიერ-მინისტრმა გამოხატა დიდი ბრიტანეთის ურყევი მხარდაჭერა და მიესალმა უკრაინის შეიარაღებული ძალების პროგრესს ბრძოლის ველზე“,- აღნიშნა ბრიტანეთის მთავრობის წარმომადგენელმა.
ვოლოდიმირ ზელენსკიმ და რიში სუნაკმა ასევე განიხილეს რუსეთის მიერ შავი ზღვის მარცვლეულის ბლოკადის გავლენა როგორც უკრაინაზე, ასევე მთელ მსოფლიოში სურსათის მიწოდებაზე.
