უკრაინამ თურქეთს, რუსეთის გარეშე „მარცვლეულის დერეფნის“ მუშაობის აღდგენის შესახებ წინადადება შესთავაზა, რადგან არ არსებობს არანაირი შეზღუდვა ხომალდებისთვის, რომლებიც გადიან დერეფნებს რუმინეთის, ბულგარეთისა და თურქეთის ტერიტორიული წყლების გავლით. ამის შესახებ პრესკონფერენციაზე თურქეთში უკრაინის ელჩმა ვასილი ბოდნარმა განაცხადა.
„წინადადება რუსეთის გარეშე {„მარცვლეულის დერეფნის“} მუშაობის შესახებ თურქულ მხარეს გადაეცა. ჯერ არ გვაქვს საბოლოო დადასტურება. მაგრამ ვინაიდან გემები უკვე გადიან რუმინეთის, ბულგარეთის, ასევე თურქეთის ტერიტორიულ წყლებს და გადიან სრუტეებს შეზღუდვების გარეშე, ეს რეალურად რაციონალური გზაა“, - განაცხადა ელჩმა.
მან აღნიშნა, რომ „მარცვლეულის შეთანხმების“ ფარგლებში საკმაოდ ხშირად იყო შემთხვევები, როდესაც რუსეთი ზღუდავდა უკრაინაში გემების შესვლას ან ცდილობდა ამა თუ იმ უკრაინულ პორტამდე მისვლის რეგულირებას. ამის გარდა, იზღუდებოდა პროდუქცია, რომლის ექსპორტიც უკრაინიდან იყო შესაძლებელი.
ბოდნარის თქმით, ვინაიდან ამ ჰუმანიტარულ დერეფანში გამავალი გემებისთვის უკრაინული პროდუქციის ექსპორტის შეზღუდვები არ არსებობს, ასეთი ალტერნატიული ვარიანტი შეიძლება იყოს ერთ-ერთი მთავარი, ვითარების მოსაგვარებლად.
ამჟამად, მიმდინარეობს კომუნიკაცია თურქეთსა და გაერო-ს შორის უკრაინასთან და რუსეთთან მოლაპარაკებების შედეგებზე, შეთანხმებული პოზიციების შემუშავების მიზნით. მოლაპარაკებების პროცესში მონაწილეები ელიან უმაღლეს დონეზე უკრაინასა და თურქეთს შორის კომუნიკაციას. ელჩის თქმით, მოლაპარაკებები შესაძლოა უახლოეს დღეებში გაეროს გენერალური ასამბლეის ფარგლებშიც მოხდეს.
„ჩვენ, რა თქმა უნდა, კონსტრუქციულ პოზიციას ვიკავებთ ჩვენს პარტნიორებთან თურქეთთან, გაეროსთან და შუამავლებთან მიმართ და შევიმუშავებთ მექანიზმებს, რომლებიც სასარგებლო იქნება ჩვენი მხარისთვის, მაგრამ არ დააზარალებს პრინციპულ პოზიციას რუსეთის მიმართ სანქციებთან დაკავშირებით, ეს აბსოლუტურად მცდარი გზა იქნება“, - თქვა ბოდნარმა.
