უკრაინის პრეზიდენტმა ვოლოდიმირ ზელენსკიმ ბუქარესტში სამი ზღვის სამიტის მონაწილეებს მოუწოდა უარი თქვან უკრაინული მარცვლეულის ექსპორტის შემდგომ დაბლოკვაზე.
ზელენსკიმ განაცხადა, რომ რუსეთი გამუდმებით თავს ესხმის უკრაინულ პორტებს სამხრეთში, ანადგურებს ინფრასტრუქტურას და მარცვლეულის მარაგებს.
„საბოლოო ჯამში ეს სასტიკი აგრესია ყველას წინააღმდეგაა, მათ შორის ევროპელების წინააღმდეგ. შედეგები ყველგან იგრძნობა. უკრაინა წინააღმდეგია მარცვლეულის ექსპორტის შემდგომ შეზღუდვაზე, ვინაიდან ჩვენ გვჭირდება, რომ ეს პროდუქცია ექსპორტზე გავიდეს, იმიტომ, რომ ჩვენ გვჭირდება სახსრები... საუბარია გადარჩენაზე რუსული ტერორის პირობებში“, - განაცხადა ზელენსკიმ.
უკრაინის პრეზიდენტმა მიმართა ბულგარეთის, სლოვაკეთის, პოლონეთისა და უნგრეთის ლიდერებს და აღნიშნა, რომ უკრაინული ექსპორტის ნებისმიერი აკრძალვა მხოლოდ ზრდის რუსული აგრესიით გამოწვეულ ტანჯვას და ნგრევას. მისივე თქმით, ევროპის ეკონომიკური კავშირის ფუნდამენტი არის თავისუფალი ვაჭრობა და თავისუფალ კონკურენციაში ჩაურევლობა.
„ჩვენ არ შეგვიძლია მშვიდად მივიღოთ ჩვენთვის მოცემული პირობების დარღვევა... უკრაინა იბრძვის ჩვენი ევროპული ღირებულებების გადარჩენისთვის, რომელსაც ჩვენ ვიცავთ ბრძოლის ველზე... ჩვენ ვიბრძვით უკრაინისთვის და თუ ჩვენ მოგვიწევს ვიბრძოლოთ ევროპული პრინციპების საფუძვლებისთვის, ჩვენ ამას გავაკეთებთ. მაგრამ ვიმედოვნებთ, რომ ერთიანობა შენარჩუნდება და ის გაიმარჯვებს“, - აღნიშნა ზელენსკიმ.
მაისში ევროკავშირმა ბულგარეთს, პოლონეთს, რუმინეთს, სლოვაკეთსა და უნგრეთს ნება დართო, აეკრძალათ უკრაინული ხორბლის, სიმინდის, რაფსის და მზესუმზირის თესლის შიდა გაყიდვა, ხოლო საქონლის ტრანზიტი სხვა ქვეყნებში ექსპორტისთვის. ეს აკრძალვა 15 სექტემბერს იწურება.
