აშშ-მა უკრაინისთვის ახალი სამხედრო დახმარების პაკეტის გამოყოფის შესახებ განაცხადა, რომლის ღირებულებაც 175 მლნ დოლარს შეადგენს. დახმარების პაკეტი მოიცავს 120 მმ-იან ჭურვებს გაღარიბებული ურანით „აბრამსის“ ტიპის ტანკებისთვის. ამის შესახებ ნათქვამია პენტაგონის განცხადებაში.
როგორც მანამდე გახდა ცნობილი უკრაინა „აბრამსის“ ტიპის ტანკებს სექტემბერში მიიღებს. დახმარების პაკეტი ასევე მოიცავს ჭურვებს HIMARS-ის ტიპის სარაკეტო სისტემებისთვის, აღჭურვილობას უკრაინის საჰაერო თავდაცვის სისტემების მხარდასაჭერად, 155 მმ-იანი და 105 მმ-იანი კალიბრის საარტილერიო ჭურვებს, საბრძოლო მასალას ნაღმტყორცნებისთვის, Javelin-ის ტანკსაწინააღმდეგო კომპლექსებს და სხვა შეიარაღებას.
„შეერთებული შტატები მომავალშიც გააგრძელებენ მუშაობას თავის მოკავშირეებთან და პარტნიორებთან, რათა უკრაინამ შეძლოს დააკმაყოფილოს მისი გადაუდებელი საბრძოლო მოთხოვნილებები და უსაფრთხოების სფეროში დახმარების გრძელვადიანი საჭიროებები“, - განაცხადეს პენტაგონში.
