თეთრი სახლი და აშშ-ის სახელმწიფო დეპარტამენტი ჩრდილოეთ კორეას მოუწოდებენ შეწყვიტოს რუსეთთან მოლაპრაკებები საბრძოლო მასალების მიწოდებასთან დაკავშირებით.
ამერიკის დაზვერვის მონაცემებით, ფხენიანი და მოსკოვი ამ მოლაპარაკებებს უკვე დიდი ხანია აწარმოებენ. გამოცემა The New York Times წყაროზე დაყრდნობით წერდა, რომ ჩრდილოეთ კორეის ლიდერი კიმ ჩენ ინი მომდევნო კვირას ვლადივოსტოკში ჩასვლას და რუსეთის პრეზიდენტ ვლადიმირ პუტინთან პირადად ამ საკითხის განხილვას გეგმავს.
„მოვუწოდებთ ჩრდილოეთ კორეას შეწყვიტოს მოლაპარაკებები შეიარაღებასთან დაკავშირებით რუსეთთან და შეასრულოს საჯარო ვალდებულებები, არ მიაწოდოს და არ მიჰყიდოს რუსეთს იარაღი“, - CNN -ის ცნობით, ამის შესახებ განაცხადა სახელმწიფო დეპარტამენტის პრესსპიკერის მოადგილემ ვედანტ პატელმა.
ამავე თემაზე ბრიფინგზე ისაუბრა ეროვნული უსაფრთხოების საკითხებში აშშ-ის პრეზიდენტის მრჩეველმა ჯეიკ სალივანმაც.
„ჩვენ კვლავ მოვუწოდებთ ჩრდილოეთ კორეას შეასრულოს საჯარო ვალდებულებები, არ მიაწოდოს იარაღი რუსეთს, რომელსაც ის უკრაინელების წინააღმდეგ გამოიყენებს“, - განაცხადა სალივანმა.
მისივე თქმით, აშშ-ის ადმინისტრაცია ჯერჯერობით ვერ ხედავს რუსეთისთვის ჩრდილოეთ კორეული ან ნებისმიერი იარაღის მიწოდების ნიშნებს, თუმცა ამასთან, აკვირდება მოლაპარაკებების აქტიურ წინსვლას ამ თემასთან დაკავშირებით.
სალივანმა გაიმეორა ამერიკელი ოფიციალური პირების მოსაზრება, რომ რუსეთის სურვილი ჩრდილოეთ კორეასგან იყიდოს საბრძოლო მასალა, ადასტურებს, რომ სანქციებმა საკმაოდ მნიშვნელოვნად შეარყიეს რუსეთის სამხედრო მრეწველობის შესაძლებლობები.
