დნიპროში, უკრაინის პოლიციამ პატრულის თანამშრომლების სიცოცხლის ხელყოფის მცდელობის მუხლით სისხლის სამართლის საქმე აღძრა 29 აგვისტოს მომხდარ კონფლიქტთან დაკავშირებით, რა დროსაც სამართალდამცველმა მოძრაობის წესების დარღვევისთვის გაჩერებული მოქალაქე ჯუმბერ სილაგავა სასიკვდილოდ დაჭრა. ინფორმაციას უკრაინული მედია ავრცელებს.
გამოძიების სახელმწიფო ბიუროში აცხადებენ, რომ ავტომობილის მძღოლმა საგზაო მოძრაობის წესები დაარღვია, იქცეოდა აგრესიულად და სავარაუდოდ იყო არაფხიზელ მდგომარეობაში. ეროვნულმა პოლიციამ შიდა გამოძიება დაიწყო და პატრულის ორივე თანამშრომელი სამსახურიდან გაათავისუფლა.
სამართალდამცველთა ცნობით, ამჟამად მიმდინარეობს ინციდენტის გარემოებების დადგენა.
29 აგვისტოს საპატრულო პოლიციის ეკიპაჟმა დნიპროში მოძრაობის წესების დარღვევისთვის მანქანა გააჩერა. გავრცელებული ცნობით, მძღოლი და მგზავრი სამართალდამცველების მოთხოვნას არ დაემოჩილნენ, მანქანის მძღოლმა, უკრაინის მოქალაქე ჯუმბერ სილაგავამ სამართალდამცველებს სიტყვიერი შეურაცხყოფა მიაყენა. პოლიციამ მის წინააღმდეგ წიწაკის სპრეი გამოიყენა. ფიზიკური დაპირისპირების დროს პოლიციელმა ტაბელური იარაღიდან გაისროლა, რის შედეგადაც სილაგავა სასიკვდლოდ დაიჭრა. დაწყებულია სამსახურეობრივი გამოძიება იარაღის კანონზომიერად გამოყენების დასადგენად.
უკრაინის სისხლის სამართლის კოდექსი სამართალდამცავი ორგანოს თანამშრომლის სიცოცხლის ხელყოფის მცდლეობისთვის 9-დან 15 წლამდე თავისუფლების აღკვეთას ან სამუდამო პატიმრობას ითვალისწინებს.
