საფრანგეთის სახელმწიფო სკოლებში აიკრძალა ტრადიციული მუსულმანური სამოსის - აბაიას ტარება, რომელიც ქალის მთელ სხეულს ფარავს. იუწყება BFMTV.
განათლების მინისტრ გაბრიელ ატალის განცხადებით, ეროვნულ დონეზე უნდა იარსებოს მკაფიო წესებმა, რომლებსაც სკოლის ადმინისტრაცია დაეყრდნობა.
მინისტრმა ჯერ კიდევ ივლისში, თანამდებობაზე დანიშვნის შემდეგ, მიანიშნა, რომ მსგავსი გადაწყვეტილება მზადდებოდა, რადგან ასეთი სამოსის ტარება - რელიგიური მრწამსის გამოხატულებაა, საფრანგეთში კი სახელმწიფო სკოლები საეროა.
„როდესაც შედიხართ კლასში, არ უნდა გიწევდეთ მოსწავლის რელიგიური მრწამსის იდენტიფიცირება“, - აღნიშნავდა ატალი.
საფრანგეთში მუსლიმთა არასამთავრობო ასოციაციის საბჭო მოითხოვს, რომ აბაია არ უნდა მიიჩნეოდეს მუსულმანურ რელიგიურ სიმბოლოდ.
ჯერ კიდევ გასული წლის ნოემბერში საფრანგეთში გამოიცა დოკუმენტი, რომელშიც წერია, რომ აბაია, ისევე როგორ გრძელი კაბები, შესაძლოა, აიკრძალოს, თუ მათ ატარებენ რელიგიური მრწამსის მინიშნების მიზნით. თუმცა სკოლების ადმინისტრაციამ მოითხოვა დეტალური განმარტება, რათა კონფლიქტები თავიდან აერიდებინათ.
საფრანგეთში, სახელმწიფო სასწავლო დაწესებულებებში ჯერ კიდევ 2004 წელს აიკრძალა ისეთი სამოსის ან სიმბოლოების ტარება, რომელიც მკაფიოდ მაინიშნებს რელიგიურ კუთვნილებას.
ამასთან, ივნისში, საფრანგეთის ადმინისტრაციულმა სასამართლომ ძალაში დატოვა ჰიჯაბის ტარების აკრძალვა საფეხბურთო მატჩებზე.
