რუსეთის თავდაცვის სამინისტროს განცხადება შავ ზღვაში პალაუს დროშის ქვეშ მცურავ სატვირთო ხომალდ „სუქრუ ოქანის“ შემოწმების შესახებ ოფიციალურად არავის დაუდასტურებია.
ამის შესახებ უკრაინის სამხრეთის თავდაცვის ძალების ერთობლივი საკოორდინაციო პრესცენტრის ხელმძღვანელმა, ნატალია გუმენიუკმა ტელემარათონის დროს განაცხადა.
"ინფორმაცია, რომელიც რუსეთის თავდაცვის სამინისტრომ გააჟღერა, ოფიციალური წყაროებისგან არ დადასტურებულა. მიმაჩნია, რომ ამას ყურადღება უნდა მივაქციოთ და გავიხსენოთ ჰიბრიდული ომის თავისებურებები.
როდესაც რაიმე მოვლენა ხდება, რომელშიც ჩართულია რამდენიმე მონაწილე, აუცილებლად არსებობს ოფიციალური თვალსაზრისი ერთი, მეორე, მესამე მხარის მიერ - ყველას მიერ, რომლებიც ჩართულია {მოვლენებში}. დღეისათვის ჩვენ გვაქვს მხოლოდ ერთი - რუსეთის ფედერაციის თავდაცვის სამინისტროს აგრესიის დემონსტრირება. ისინი ყველანაირი ძალით ცდილობენ ხაზი გაუსვან თავიანთ ბატონობას შავ ზღვაში, თითქოს მათ შეუძლიათ გააჩერონ ხომალდი, ასწიონ ავიაცია და ამისთვის მათ პასუხს არავინ მოსთხოვს. მაგრამ დღეისათვის ამ ვერსიას მათ გარდა სხვა არავინ ადასტურებს“, - განაცხადა გუმენიუკმა.
დღეს რუსეთის თავდაცვის სამინისტროში განაცხადეს, რომ შავი ზღვის ფლოტის რუსულმა ხომალდმა „ვასილი ბიკოვმა“, შავ ზღვაში პალაუს დროშის ქვეშ მცურავ სატვირთო ხომალდს „სუქრუ ოქანს“ გამაფრთხილებელი ცეცხლი გაუხსნა. მათივე განცხადებით, დაუმორჩილებლობის გამო რუსი სამხედროები სატვირთო ხომალდზე ვერტმფრენიდან დაეშვნენ, გემი შეამოწმეს და პორტისკენ სვლის ნება დართეს.
ამასთან, საერთაშორისო სადაზვერვო ორგანიზაცია InformNapalm აცხადებს, რომ რუსულმა მხარემ „სუქრუ ოქანის“ შემოწმებისა და მისთვის გამაფრთხილებელი ცეცხლის გახსნის შესახებ ცრუ ინფორმაცია გაავრცელა.
