სამხედრო ხუნტის მიერ დამხობილი ნიგერის პრეზიდენტმა მუჰამედ ბაზუმმა აშშ-სა და სხვა ქვეყნებს მოუწოდა დაეხმარონ მას კონსტიტუციური წესრიგის აღდგენაში, მისივე თქმით, თუ პუტჩისტები ხელისუფლებაში დარჩებიან, მთელი ცენტრალური საჰელის რეგიონი რუსეთისა და დაჯგუფება „ვაგნერის“ გავლენის ქვეშ მოექცევა.
„ამ რთულ დროს მოვუწოდებ შეერთებული შტატების მთავრობას და მთელ საერთაშორისო საზოგადოებას, დაგვეხმარონ კონსტიტუციური წესრიგის ადგენაში“, - წერს მუჰამედ ბაზუმი ამერიკულ გამოცემა Washington Post-ში.
ბაზუმი ასევე აღნიშნავს, რომ ნიგერის სამხედრო ხუნტას სურს, ისევე, მეზობელი მალისა და ბურკინა-ფასოს ხუნტების მსგავსად, მოიწვიოს რუსული დაჯგუფება „ვაგნერი“ ფრანგებისა და ამერიკელების ნაცვლად, რომლებიც ამ დრომდე ნიგერს ისლამისტური რადიკალების წინააღმდეგ ბრძოლაში ეხმარებოდნენ.
„მთელი ცენტრალური საჰელის რეგიონი, შესაძლოა, მოხვდეს რუსეთის გავლენის ქვეშ დაჯგუფება „ვაგნერის“ მეშვეობით, რომლის სასტიკი ტერორისტული მეთოდებიც უკვე ვნახეთ უკრაინაში“, - წერს ბაზუმი.
მისივე თქმით, პუტჩისტი სამხედროების მტკიცების მიუხედავად, ნიგერში აშშ-სა და საფრანგეთის დახმარებით ბოლო ორი წლის განმვალობაში ცხოვრება უსაფრთხო გახდა, ისლამისტური დაჯგუფებების თავდასხმები სამხრეთში, დასავლეთსა და ჩრდილოეთში თითქმის შეწყდა.
მუჰამედ ბაზუმი ნიგერის პირველი პრეზიდენტია, რომელმაც 2021 წელს მშვიდობიან და დემოკრატიულ არჩევნებში გაიმარჯვა.
ნიგერში სამხედროებმა სახელმწიფო გადატრიალების შესახებ 27 ივლისს განაცხადეს.
მუჰამედ ბაზუმი საპრეზიდენტო გვარდიის ჯარებმა 26 ივლისს დააკავეს.
ნიგერში მოქმედებენ ჯიხადისტები, ასევე დაჯგუფებები, რომლებიც დაკავშირებულები არიან „ალ-ქაიდასთან“ და „ისლამურ სახელმწიფოსთან“.
