პოლონეთის თავდაცვის სამინისტრო ადასტურებს, რომ ორმა ბელარუსულმა ვერტმფრენმა პოლონეთის საჰაერო სივრცე დაარღვია.
პოლონეთის თავდაცვის უწყებაში აცხადებენ, რომ პოლონეთის საჰაერო სივრცე დაარღვიეს ვერტმფრენებმა, რომლებიც ახორციელებდნენ წვრთნებს საზღვრის სიახლოვეს. ამ წვრთნების შესახებ მინსკმა ვარშავა წინასწარ გააფრთხილა.
„საზღვრის გადაკვეთა მოხდა ქალაქ ბელოვეჟის რაიონში ძალიან დაბალ სიმაღლეზე, რამაც გაართულა მისი აღმოჩენა რადიოლოკაციური სისტემებით. ამიტომ დღეს დილით პოლონეთის შეიარაღებული ძალების ოპერატიულმა სარდლობამ კომუნიკეში განაცხადა, რომ პოლონეთის რადიოლოკაციურმა სისტემებმა ვერ დააფიქსირეს პოლონეთის საჰაერო სივრცის დარღვევა“, - განმარტეს უწყებაში.
ინციდენტის საპასუხოდ პოლონეთის თავდაცვის მინისტრმა მარიუშ ბლაშაკმა ბრძანება გასცა საზღვარზე სამხედროების რაოდენობის გაზრდისა და დამატებითი ძალებისა და ტექნიკის, მათ შორის საბრძოლო ვერტმფრენების გადასროლის შესახებ.
ასევე პოლონეთმა ინფორმაცია მიაწოდა ნატოს და საგარეო საქმეთა სამინისტროში დაიბარა ბელარუსის საქმეთა დროებითი რწმუნებული ინციდენტის განმარტებისთვის.
