საბერძნეთის კუნძულის როდოსის სამხრეთიდან ევაკუირებულია ათასობით ადამიანი, მათ შორის ტურისტები, კუნძულზე მძვინვარე ტყის ხანძრების გამო.
ბერძნული მედიის ინფორმაციით, ორი სოფლის მაცხოვრებლები და რამდენიმე სასტუმროს ბინადარი - სულ 8 ათასმდე ადამიანი გამოიყვანეს. სანაპირო დაცვის წარმომადგენლების ცნობით, დაფიქსირდა ნავების გამოძახების 1500 შემთხვევა სამხრეთ სანაპიროდან. მაშველები აღნიშნავენ, რომ უახლოეს დღეებში ევაკუირებულთა რაოდენობა, შესაძლოა, კიდევ გაიზარდოს.
კუნძულის სამხრეთ ნაწილში ხანძრის შედეგად გამოწვეული დაკვამლიანება იმდენად ძლიერია, რომ სუნთქვა შეუძლებელია. მედიის ცნობით, რესპირატორული პრობლემების გამო ჰოსპიტალიზებულია რვა ადამიანი. ხანძართან ბრძოლას ართულებს ცვალებადი მიმართულების ძლიერი ქარიც.
როდოსზე ძლიერი ხანძარი მაღალმა ტემპერატურამ და გვალვამ გამოიწვია.
საბერძნეთის სამხრეთით ჰაერის ტემპერატურა 44 გრადუსს აღწევს. ეგეოსის ზღვის კუნძულებზე 38 გრადუსი სიცხე ფიქსირდება. ამასთან, დიდი ხანი არ ყოფილა ნალექი. სინოპტიკოსების ცნობით, უახლოეს დღეებში ძლიერი სიცხეები გაგრძელდება. ამასთან იუწყებიან, რომ მაღალი ტემპერატურის მიმდინარე პერიოდი, შესაძლოა, ყველაზე ხანგრძლივი გახდეს ისტორიაში.
