რუსეთის პრეზიდენტმა ვლადიმირ პუტინმა განაცხადა, რომ ნატო-ში უკრაინის პოტენციური გაწევრიანება რუსეთისთვის საფრთხის შემცველია და არც კიევს დაეხმარება.
ამის შესახებ პუტინმა „როსია 24“-თან ინტერვიუში განაცხადა.
პუტინმა კომენტარი გააკეთა ნატო-სამიტის გადაწყვეტილებაზე და მორიგ ჯერზე გაიმეორა ალიანსში უკრაინის მომავალ წევრობასთან დაკავშირებული საფრთხის შესახებ. პუტინის თქმით, სწორედ ნატო-ში უკრაინის გაწევრიანების საფრთხე იყო ომის დაწყების მიზეზი.
„ჩვენ არაერთხელ ვილაპარაკეთ ამის შესახებ: ეს შექმნის საფრთხეს რუსეთის უსაფრთხოებისათვის, ცხადია... მე დარწმუნებული ვარ, რომ ეს არ გაზრდის თავად უკრაინის უსაფრთხოებას. დიახ და საბოლოო ჯამში მსოფლიოს უფრო მოწყვლადს გახდის და გამოიწვევს დამატებით დაძაბულობას საერთაშორისო არენაზე.
ამიტომ ამაში ვერაფერს კარგს ვერ ვხედავ. ჩვენი პოზიციები კარგად არის ცნობილი და დიდი ხნის წინ ფორმულირებული“, - აღნიშნა პუტინმა.
უკრაინასა და “დიდი შვიდეულის“ ლიდერებს შორის მიღწეული შეთანხმების შესახებ უსაფრთხოებასან დაკავშირებით პუტინმა განაცხადა, რომ ყველა ქვეყანას აქვს უფლება უზრუნველყოს უსაფრთხოება ისე, როგორც საჭიროდ მიაჩნია, მაგარმ არა სხვების უსაფრთხოების ხარჯზე.
