რუსეთის სპეცსამსახურებმა დაჯგუფება „ვაგნერის“ დამფუძნებლის ევგენი პრიგოჟინის აჯანყებასთან დაკავშირებით სულ მცირე 13 სამხედრო პირი, მათ შორის გენერალი სერგეი სუროვიკინი დააკავეს, 15 ოფიცერი კი საქმიანობას ჩამოაშორეს. ინფორმაციას The Wall Street Journal ავრცელებს.
გამოცემის წყაროს ცნობით, სუროვიკინი, რომელიც უკრაინაში რუსეთის საოკუპაციო ძალების მეთაურის მოადგილეა, ამბოხის დაწყებიდან რამდენიმე საათში დააკავეს, ამჟამად ის მოსკოვში ჰყავთ დაკავებული. მისთვის ბრალი არ წაუყენებიათ.
წყაროს ინფორმაციით, სუროვიკინი არ იმყოფება საგამოძიებო იზოლატორში, თუმცა WSJ-ის წყაროების ცნობით, ის რამდენჯერმე დაიკითხა, ვინაიდან გამოძიება ცდილობდა გაერკვია მისი როლი ამბოხში.
ერთ-ერთმა წყარომ გამოცემას განუცხადა, რომ სუროვიკინმა აჯანყების გეგმების შესახებ იცოდა, თუმცა ამბოხში არ მონაწილეობდა.
წყაროს აზრით, გენერალი, შესაძლოა გაათავისუფლონ, როდესაც პუტინი მიიღებს გადაწყვეტილებას ამბოხის შედეგებთან დაკავშირებით.
დაკითხვის მიზნით, სულ 13 უფროსი ოფიცერი დააკავეს, ზოგიერთი მათგანი მოგვიანებით გაუშვეს. დაახლოებით 15 ოფიცერი საქმიანობას ჩამოაშორეს ან სამსახურიდან გაათავისუფლეს. ერთ-ერთი წყაროს თქმით, დაკავებები უკავშირდება იმ პირების წმენდას, რომლებსაც ხელისუფლება აღარ ენდობა.
ასევე დაკავებულები იყვნენ სუროვიკინის მოადგილე ანდრეი იუდინი და სამხედრო დაზვერვის უფროსის მოადგილე ვლადიმირ ალექსეევიც, თუმცა მოგვიანებით გაათავისუფლეს. ისინი ჩამოაშორეს თავიანთ საქმიანობას. მათ შეზღუდული აქვთ გადაადგილება და თვალთვალის ქვეშ იმყოფებიან.
დაკავებულებს შორის იყო ყოფილი გენერალ-პოლკოვნიკი მიხაილ მიზინცევი, რომელიც ადრე იკავებდა თავდაცვის მინისტრის მოადგილის პოსტს. აპრილის ბოლოს კი შეუერთდა „ვაგნერს“.
მიზინცევს „მარიუპოლის ყასაბს“ უწოდებდნენ, რადგან ხელმძღვანელობდა ქალაქის შტურმს, რომელიც მოიცავდა სამოქალაქო ინფრაქტრუქტურის მასირებულ დაბომბვებს, რათა ქალაქისთვის დანებება აეძულებინათ.
მიზინცევი მინისტრის მოადგილის პოსტიდან გაათავისუფლეს, ის პასუხისმგებელი იყო ლოჯისტიკაზე. მიზინცევი აჯანყებამდე რამდენიმე თვით ადრე „ვაგნერს“ შეუერთდა.
მანამდე ეფ-ეს-ბემ განაცხადა, რომ პრიგოჟინის ამბოხის საქმეზე გამოძიება შეწყვეტილია. თუმცა სუროვიკინი 24 ივნისის შემდეგ, როდესაც მან „ვაგნერს“ დანებებისკენ მოუწოდა, საჯაროდ აღარ გამოჩენილა.
