უკრაინას მოვიწვევთ ნატო-ში, როდესაც მოკავშირეები შეთანხმდებიან და პირობები შესრულდება, - ამის შესახებ ნატო-ს გენერალურმა მდივანმა იენს სტოლტენბერგმა ვილნიუსში, სამიტის პირველი დღის შეხვედრების დასრულების შემდეგ გამართულ პრესკონფერენციაზე განაცხადა.
სტოლტენბერგის თქმით, შეთანხმდნენ, რომ უკრაინა მიიღებს მოწვევას ნატოში, როდესაც პირობები შესრულდება.
„დღეს ალიანსის ლიდერები შეთანხმდნენ სამ ელემენტზე, რათა უკრაინა ნატო-სთან კიდევ უფრო დააახლოვონ.
პირველი ეს არის მრავალწლიანი დახმარება, რომელიც უკრაინას საბჭოთა სტანდარტებიდან ნატო-ს სტანდარტებზე გადაიყვანს, აღადგენს უსაფრთხოებისა და თავდაცვის სექტორებს. ამასთან დავფაროთ კრიტიკული საჭიროებები, როგორიცაა საწვავი, განაღმვითი აღჭურვილობა და მედიკამენტები.
მეორე, ეს არის უკრაინა-ნატო-ს საბჭო კონსულტაციებისა და გადაწყვეტილებების მიღებისთვის, სადაც ჩვენ ერთმანეთს შევხვდებით, როგორც თანასწორი მხარეები. ხვალ გაიმართება ამ საბჭოს პირველი შეხვედრა პრეზიდენტ ზელენსკის თანდასწრებით.
მესამე: ჩვენ კიდევ ერთხელ ვადასტურებთ, რომ უკრაინა გახდება ნატოს წევრი და ვთანხმდებით, რომ წევრობის სამოქმედო გეგმის [MAP] ეტაპი ამოღებულია. ეს შეცვლის უკრაინის გზას ნატო-სკენ და ორსაფეხურიანი პროცესი ერთსაფეხურიანი გახდება. ჩვენ ასევე შევთანხმდით, რომ უკრაინას მოვიწვევთ ნატო-ში, როდესაც მოკავშირეები შეთანხმდებიან და პირობები შესრულდება," - განაცხადა სტოლტენბერგმა.
