უკრაინის პრეზიდენტმა ვოლოდიმირ ზელენსკიმ განაცხადა, რომ ჯო ბაიდენს შეეძლო უკრაინაში ომის 5 წუთში დასრულება, თუ საუბარი იქნებოდა უკრაინის ტერიტორიების დათმობაზე, მაგრამ უკრაინა ამას არ დათანხმდებოდა.
ამის შესახებ ზელენსკიმ ABC News-თან ინტერვიუში განაცხადა.
ზელენსკიმ კიდევ ერთხელ გააკეთა კომენტარი აშშ-ის ყოფილი პრეზიდენტის დონალდ ტრამპის განცხადებაზე, რომ უკრაინაში ომს 24 საათში დაამთავრებდა, თუმცა ზელენსკიმ აღნიშნა, რომ ტრამპს უკვე ჰქონდა ამის შანსი, როდესაც აშშ-ის პრეზიდენტის პოსტს იკავებდა იმ დროს, როცა უკრაინაში ჰიბრიდული ომი მიმდინარეობდა.
”ომის დასრულების მხოლოდ სურვილი - მშვენიერია. მაგრამ ეს სურვილი უნდა ეფუძნებოდეს გარკვეულ რეალურ გამოცდილებას. როგორც ჩანს, დონალდ ტრამპს უკვე ჰქონდა ეს 24 საათი. ჩვენ ომის მდგომარეობაში ვიყავით, არა სრულმასშტაბიანი ომის. მაგრამ ჩვენ ვიყავით ომის მდგომარეობაში და ვფიქრობ, მას {ტრამპს} ეს დრო ჰქონდა განკარგულებაში, მაგრამ მას როგორც ჩანს სხვა პრიორიტეტები ჰქონდა.
თუ ჩვენ ვსაუბრობთ უკრაინის ფასად ომის დასრულებაზე, ანუ იმაზე, რომ ჩვენ უარი უნდა ვთქვათ ჩვენს ტერიტორიებზე, ვფიქრობ, რომ ამ შემთხვევაში ბაიდენს შეეძლო მისი დამთავრება ხუთ წუთშიც კი, მაგარმ ჩვენ ამას არ დავთანხმდებოდით“, - განაცხადა ზელენსკიმ.
