უკრაინის ქალაქ ლვივში, რუსეთის სარაკეტო დარტყმის შედეგად მსხვერპლთა რაოდენობა 5-მდე გაიზარდა. საოლქო ადმინისტრაციის ხელმძღვანელის მაქსიმ კოზაცკის განცხადებით, მაშველებმა ქალის ცხედარი ნანგრევებიდან ამოიყვანეს.

უკრაინის შინაგან საქმეთა სამინისტროს ინფორმაციით, დანგრეულია საცხოვრებელი სახლის სამი სადარბაზოს მესამე და მეოთხე სართულები. დაშავებულია 40 ადამიანი, მათ შორის ბავშვი. მაშველებმა გადაარჩინეს 7 ადამიანი, 64 კი სახიფათო ადგილებიდან გაიყვანეს.

ნანგრევებისგან ტერიტორიის გაწმენდა ამ დრომდე გრძელდება. მაშველები ნანგრევების ქვეშ მოყოლილ ადამიანებს ჯერ კიდევ ეძებენ.

უკრაინის არმიის საჰაერო ძალებმა განაცხადეს, რომ შავი ზღვის აკვატორიიდან, ხომალდებიდან და წყალქვეშა ნავებიდან „კალიბრის“ ტიპის ფრთოსანი რაკეტებით იერიში დაახლოებით ღამის 1-ელ საათზე  განხორციელდა.

მათივე ცნობით, დაფიქსირდა რაკეტების რამდენიმე ჯგუფი, რომელიც თვდაპირველად ჩრდილოეთისკენ მოძრაობდა, შემდეგ კი მკვეთრად შეიცვალა კურსი დასავლეთისკენ.

საბოლოო ჯამში უკრაინის ძალებმა 10 ფრთოსანი რაკეტიდან შვიდი გაანადგურეს. სამი კი ლვივში სამოქალაქო ობიექტებს მოხვდა.

რუსეთის თავდაცვის სამინისტროს ლვივზე დარტყმის შესახებ უშუალო კომენატრი არ გაუკეთებია, თუმცა განაცხადა, რომ ღამით, სამხედროებმა  შორ მანძილზე მოქმედი შეიარაღებით „კონცენტრირებული დარტყმა“ განახორციელეს უკრაინის შეიარაღებული ძალების პირადი შემადგენლობის დროებითი დისლოკაციის პუნქტებისა და „უცხოელი დაქირავებულების“ წინააღმდეგ. ამასთან, რუსულ მხარეს არ დაუზუსტებია სად მდებარეობდა მათ მიერ გამოცხადებული სამიზნეები.