უკრაინული მედიის ცნობით, რუსეთის ძალების მიერ ხერსონის რეგიონის დაბომბვის შედეგად ერთი ადამიანი დაიღუპა, ხოლო 5 დაშავდა.
ხერსონის საოლქო პროკურატურის ინფორმაციით, ოკუპანტებმა ცეცხლი გაუხსნეს ბელოზერკის თემის დასახლებას. მათივე ინფორმაციით, დაიღუპა მამაკაცი, სულ მცირე სამი მოქალაქე კი დაშავდა.
მოგვიანებით უკრაინის პრეზიდენტის ოფისის ხელმძღვანელმა ანდრი ერმაკმა განაცხადა, რომ ოკუპანტებმა დაბომბეს საცხოვრებელი სახლები - ამჟამად ცნობილია ერთი დაღუპულისა და 5 დაშავებულის შესახებ, რომელთა შორის ერთი ბავშვია.
„სიცოცხლესთან შეუთავსებელი დაზიანებები მიიღო 58 წლის კაცმა, რომელიც ავტოფარეხში იმყოფებოდა. სახლში ხანძარი გაჩნდა, ასევე დაშავდა 10 წლის ბიჭი და 56 წლის ქალი“, - განაცხადა ერმაკმა.
კიდევ ერთი საცხოვრებელი სახლის დაბომბვის შედეგად მსუბუქად დაშავდა 51 წლის კაცი, ასევე 70 და 41 წლის ორი ქალი.
