უნგრეთის პრემიერ-მინისტრი ვიქტორ ორბანი უკრაინისთვის მეტი ფინანსური დახმარების გაწევის წინააღმდეგია. იუწყება Reuters.
„ერთი რამ ნათელია, ჩვენ უნგრელები... არ მივცემთ მეტ ფულს უკრაინას, ვიდრე ისინი არ განმარტავენ, სად წავიდა მანამდე გაცემული 70 მილიარდამდე ევრო“, - განაცხადა ორბანმა.
ორბანის თქმით, უნგრეთს ჯერ არ მიუღია წვდომა ფონდიდან, რომელიც ფინანსდება ევროპის ქვეყნების წინა ერთობლივი სესხით.
უნგრეთი და პოლონეთი ევროკავშირის ერთადერთი წევრები არიან, რომლებმაც არ მიიღეს აღდგენის თანხები, რომლებიც ევროკომისიამ დაბლოკა იმის გამო, რომ მათი მთავრობები აზიანებენ დემოკრატიას და კანონის უზენაესობას.
20 ივნისს, ევროკომისიის პრეზიდენტი ურსულა ფონ დერ ლაიენი გამოვიდა წინადადებით, უკრაინისთვის 50 მლრდ ევროს დახმარების შესახებ გრანტებისა და კრედიტების სახით.
