აშშ-ის ყოფილმა პრეზიდენტმა დონალდ ტრამპმა არ გამორიცხა, რომ უკრაინის ხელისუფლებას, შესაძლოა, მოუწიოს რუსეთისთვის ტერიტორიების ნაწილის დათმობა, რათა შეაჩეროს ომი, რომელიც 16 თვის წინ უკრაინაში რუსული ჯარების შეჭრით დაიწყო.
ამის შესახებ ტრამპმა Reuters-თან ინტერვიუში განაცხადა.
ამასთან, მან განაცხადა, რომ რუსეთის პრეზიდენტი „ვაგნერელების“ ამბოხის შემდეგ დასუსტდა. მისივე თქმით, აშშ-მა უნდა გამოიყენოს ეს მომენტი რუსეთსა და უკრაინას შორის მოლაპარაკების დასაწყებად.
„მინდა, რომ ადამიანები აღარ იღუპებოდნენ ამ უაზრო ომის გამო“, - განაცხადა ტრამპმა. მისივე თქმით, ეს ყველაზე მნიშვნელოვანი საკითხია, რომელიც აშშ-მა ახლა უნდა გააკეთოს - ეს არის მშვიდობის დამყარება.
პუტინის წინააღმდეგ სამხედრო დანაშაულების შესახებ ბრალდებასთან დაკავშირებით, რომელიც მას სისხლის სამართლის საერთაშორისო სასამართლომ მარტში წაუყენა, ტრამპმა განაცხადა, რომ მის ბედზე ომის დასრულების შემდეგ უნდა იმსჯელონ. „იმიტომ, რომ თუ თქვენ წამოსწევთ ამ თემას, ვერასდროს მიაღწევთ მშვიდობას, ვერასდროს მიაღწევთ დარეგულირების პროცესს“, - დასძინა დონალდ ტრამპმა.
