რუსეთის პრეზიდენტმა, ვლადიმირ პუტინმა მადლობა გადაუხადა ბელარუსის პრეზიდენტ ალექსანდრ ლუკაშენკას შესრულებული სამუშაოსთვის, – ამის შესახებ ინფორმაციას ბელარუსის ლიდერის პრესსამსახური ავრცელებს.
ლუკაშენკასა და პუტინს შორის სატელეფონო საუბარი დღეს, საღამოს გაიმართა.
„ბელარუსის პრეზიდენტმა რუსეთის პრეზიდენტს დეტალურად მიაწოდა ინფორმაცია კერძო სამხედრო კომპანია „ვაგნერის“ ხელმძღვანელობასთან მოლაპარაკებების შედეგების შესახებ. რუსეთის პრეზიდენტმა მხარი დაუჭირა და მადლობა გადაუხადა ბელარუს კოლეგას შესრულებული სამუშაოსთვის“, – ნათქვამია ბელარუსის პრეზიდენტის პრესსამსახურის განცხადებაში.
მანამდე, გავრცელდა ინფორმაცია, რომ ევგენი პრიგოჟინმა მიიღო ლუკაშენკას შეთავაზება რუსეთის ტერიტორიაზე „ვაგნერის“ მებრძოლების წინსვლის შეჩერების შესახებ.
