რუსული მედიის ცნობით, რუსეთის უშიშროების ფედერალურმა სამსახურმა დაჯგუფება „ვაგნერის“ ხელმძღვანელის ევგენი პრიგოჟინის განცხადებებთან დაკავშირებით შეიარაღებული აჯანყებისკენ მოწოდების ფაქტზე სისხლის სამართლის საქმე აღძრა. ამის შესახებ რუსეთის ანტიტერორისტულ კომიტეტში აცხადებენ.
„ეფ ეს ბემ“ აღძრა სისხლის სამართლის საქმე შეიარაღებული აჯანყებისკენ მოწოდების ფაქტზე, მოვითხოვთ დაუყოვნებლივ შეწყდეს ანტისამართლებრივი მოქმედებები“, - ნათქვამია კომიტეტის განცხადებაში.
შეგახსენებთ, პრიგოჟინი რუსულ არმიას "ვაგნერის" ბანაკებზე სარაკეტო თავდასხმაში ადანაშაულებს და ამტკიცებს, რომ დაქირავებულ მებრძოლთა დიდი რაოდენობა დაიღუპა.
"ჩვენ 25 000 ვართ და მივდივართ ბოროტების დასასრულებლად. ეს სამხედრო გადატრიალება არ არის, ეს სამართლიანობის მარშია. ჩვენი ქმედებები ხელს არ უშლის ჯარის მოქმედებას. შოიგუ წითელ მოედანზე უნდა ჩამოახრჩონ და ლენინთან ერთად მავზოლეუმში დააწვინონ", - თქვა პრიგოჟინმა.
ამასთან, რუსეთის თავდაცვის სამინისტრომ განაცხადა, რომ გავრცელებული ინფორმაცია დაჯგუფება „ვაგნერის“ ბანაკებზე რუსეთის არმიის მიერ დარტყმების შესახებ სინამდვილეს არ შეესაბამება.
„სოციალურ ქსელებში ევგენი პროგოჟინის სახელით გავრცელებული ინფორმაციები და ვიდოეკადრები კერძო სამხედრო კომპანია „ვაგნერის“ ბანაკეზე რუსეთის თავდაცვის სამინისტროს მიერ დარტყმების განხორციელების შესახებ, არ შეესაბამება სიმართლეს და წარმოადგენს საინფორმაციო პროვოკაციას“, - ნათქვამია რუსეთის თავდაცვის სამინისტროს განცხადებაში.
