მოძრაობა "საქართველოს უპირველეს ყოვლისას" ერთ-ერთი ლიდერი ვატო შაქარიშვილი, ამბობს, რომ ბორჯომში, სასტუმროსთან, სადაც "გირჩი მეტი თავისუფლების" ორგანიზებით სემინარი უნდა გამართულიყო, "აღელვებული საზოგადოება" შეიკრიბა.
"ეს იყო აღშფოთებული, აღელვებული საზოგადოება, ქართველი ხალხი, ბორჯომელები, ახალციხელები ბაკურიანელები, ჩვენი მოძრაობის - "საქართველოს უპირველეს ყოვლისა" მხარდამჭერები, რომლებიც არასდროს შეეგუებიან იმას, რომ უკუღმართმა ადამიანებმა, ამ ქვეყნის მტრებმა, ჩვენი ეკლესიის მტრებმა, საქართველოს არევის მსურველებმა, მოწამლონ ახალგაზრდები. ძალადობა ისაა, რასაც გირჩი აკეთებს, არანაირი დაპირისპირება არ ყოფილა, ეს იყო აქცია ნუ დააკავშირებენ ნურც პერსონალურად ჩემთან, ნურც ჩვენს მოძრაობასთან იმ ინციდენტს, რომელიც მოხდა გორში", - ამბობს ის.
ბორჯომში, სასტუმროში, სადაც "გირჩი-მეტი თავისუფლების" ორგანიზებით სემინარი უნდა გამართულიყო 60-მდე თავდამსხმელი მიიჭრა. ისინი პარტიის წევრებსა და ბანაკში მყოფ სხვა პირებს, მათ შორის არასრულწლოვნებს, ქვებს ესროდნენ და ემუქრებოდნენ.
მანამდე, გორში ფიზიკურად თავს დაესხნენ "გირჩი-მეტი თავისუფლების" ლიდერს, ზურა ჯაფარიძეს.
