უკრაინის არმია ქალაქ ბახმუტის ნაწილს ამ დრომდე აკონტროლებს. ამის შესახებ უკრაინის ეროვნული უსაფრთხოების საჭოს მდივანმა ოლექსი დანილოვმა CNN-ს განუცხადა.
ბახმუტზე სრული კონტროლის დამყარების შესახებ დაჯგუფება „ვაგნერის“ ხელმძღვანელმა ევგენი პრიგოჟინმა 21 მაისს განაცხადა. მისი თქმით, „ვაგნერის“ მებრძოლებმა ბახმუტის მთელი ტერიტორია დაიკავეს და ქალაქიდან გასვლის პროცესს 25 მაისიდან დაიწყებენ
დანილოვის განცხადებით, კი მტერს ბახმუტი სრულად არ დაუკავებია.
„თუ ისინი {რუსები} მიიჩნევენ, რომ ბახმუტი აიღეს, შემიძლია გითხრათ, რომ ეს ასე არ არის. ამ დროისათვის ბახმუტის ნაწილი ჩვენი კონტროლის ქვეშაა“, - განაცხადა დანილოვმა.
დანილოვი მხარს უჭერს ხელისუფლების გადაწყვეტილებას ბახმუტის შენარჩუნებასთან დაკავშირებით. მის თქმით, თავდაცვითი ოპერაცია მუდმივად მთავარსარდლის შტაბის კონტროლქვეშაა.
„ბახმუტის მიმართულებით დიდი რაოდენობით რუსი სამხედრო დაიღუპა, არამხოლოდ ვაგნერელბი, არამედ სპეცრაზმელები, მედესანტეები და რუსული არმიის სხვა დანაყოფების ჯარისკაცები. განადგურდა დიდძალი ტექნიკა და მათ {რუსებმა} იქ დიდი რაოდენობით საბრძოლო მასალა დახარჯეს“, - განაცხადა დანილოვმა.
21 მაისს, უკრაინის თავდაცვის მინისტრის მოადგილემ, ანა მალიარმა განაცხადა, რომ უკრაინელმა დამცველებმა ბახმუტი ნახევრად ალყაში მოაქციეს, რაც ოკუპანტების განადგურების შესაძლებლობას იძლევა.
იმავე დღეს უკრაინის შეიარაებული ძალების აღმოსავლეთ სარდლობის წარმომადგენელმა სერჰი ჩერევატიმ განაცხადა, რომ ბახმუტი ფაქტობრივად მთლიანად არის განადგურებული რუსეთის ძალების დარტყმების შედეგად, თუმცა უკრაინის თავდაცვის ძალები აგრძელებენ პოზიციების დაკავებას ქალაქის სამხრეთ-დასავლეთ ნაწილში.
