რუსეთის, ბელგოროდის ოლქის გრაივორონის რაიონის მოსახლეობა, სადაც ადგილობრივი ხელისუფლების მტკიცებით უკრაინელი „დივერსანტები შეიჭრნენ“, რეგიონს თვითდინებით ტოვებს. ამის შესახებ ბელგოროდის ოლქის გუბერნატორმა ვიაჩესლავ გლადკოვმა განაცხადა. მისი თქმით, ადგილზე ვითარება დაძაბულია.
„გრაივორონის რაიონში ვითარება დაძაბული რჩება. ტერიტორიაზე შემოვიდა დივერსიულ-სადაზვერვო ჯგუფი... მოსახლეობის დიდმა ნაწილმა ტერიტორია დატოვა. ვისაც ამის შესაძლებლობა არ აქვს, ვეხმარებით ტრანსპორტით, ვისაც შეუძლია ტერიტორიას პირადი ტრანსპორტით ტოვებს“, _ თქვა გლადკოვმა.
ადგილობრივ ხელისუფლებას ევაკუაცის შესახებ ოფიციალუარდ არ განუცხადებია.
რუსული მედიის ცნობით, ოლქის ტერიტორიაზე „კონტრ-ტერორისტული ოპერაციის რეჟიმი“ გამოცხადდა.
დღის განმავლობაში ვრცელდებოდა ინფორმაცია, რომ უკრაინის მხარეს მებრძოლი რუსების ლეგიონმა რუსეთის ტერიტორიაზე რამდენიმე დასახლებული პუნქტი დაიკავა, მანამდე კი რუსული სასაზღვრო პუნქტი გაანადგურა. BBC-ის ცნობით, ლეგიონი „თავისუფლება რუსეთს“ და „რუსული მოხალისეთა კორპუსი“ წარმოადგენენ სამხედრო დანაყოფებს, რომლებიც უკრაინის მხარეს იბრძვიან.
ბელგოროდის ოლქის გუბერნატორის ვიაჩესლავ გლადკოვის განცხადებით, ოლქის ტერიტორიაზე, გრაივორონის რაიონში, ჭურვები მოხვდა 3 კერძო სახლს, რის შედეგადაც დაიწვა. მისივე თქმით, ჭურვები მოხვდა ადმინისტრაციის შენობასაც. სოფელ ზამოსტიეში კი ჭურვი მოხვდა საბავშვო ბაღს, რის შედეგადაც ისიც დაიწვა. მისივე მტკიცებით, დაშავდა ქალი, რომელსაც დახმარება ადგილზე გაეწია, ასევე გლადკოვი ამტკიცებს, რომ დაშავებულია ორი კაცი, რომლებიც კლინიკაში გადაიყვანეს.
უკრაინული მხარე კი აცხადებს, რომ ბელგოროდის ოლქში ლეგიონი „თავისუფლება რუსეთს“ და „რუსული მოხალისეთა კორპუსი“ მოქმედებს და უკრაინელების დასაცავად „უსაფრთხობის ზოლს“ ქმნის.
ამასთან, უკრაინის პრეზიდენტის ოფისის ხელმძღვანელის მრჩეველმა მიხაილო პოდოლიაკმა განაცხადა, რომ უკრაინას ბელგოროდში განვითარებულ მოვლენებთან კავშირი არ აქვს.