მოვითხოვთ, დაუყოვნებლივ მოხდეს იმ კანონპროექტის განხილვა, რომელიც აკრძალავს სანქცირებული პირების საქართველოს ტერიტორიაზე შემოსვლას, - ამის შესახებ „ერთიანი ნაციონალური მოძრაობის“ ფრაქციის თავმჯდომარემ, თინა ბოკუჩავამ განაცხადა.
მისი თქმით, ამ ხელისუფლების პირობებში არ არსებობს არანაირი გარანტია, რომ საქართველოს ტერიტორიაზე მომავალშიც არ შემოვლენ სანქცირებული პირები.
„ჯერ კიდევ შარშან ფრაქცია „ერთიანმა ნაციონალურმა მოძრაობამ“ ინიცირება მოახდინა კანონპროექტის, რომელიც აკრძალავდა სანქცირებული პირების საქართველოს ტერიტორიაზე შემოსვლას. ნაცვლად იმისა, რომ უმრავლესობას აღნიშნული კანონპროექტი განეხილა დაჩქარებული წესით, მათ აღნიშნული კანონპროექტი თაროზე შემოდეს და გაყინეს საპარლამენტო პროცესი. „რუსულმა ოცნებამ“ შემოუშვა სერგეი გავრილოვი თავის დროზე, რომელმაც საქართველოს მიმართა იმ სკამიდან, საიდანაც საქართველოს პირველმა პრეზიდენტმა ქვეყნის დამოუკიდებლობის აღდგენა გამოაცხადა. მათ შემოუშვეს რუსი პროპაგანდისტი პოზნერი, როდესაც მთელი ქვეყანა დახურული იყო და ადამიანები ულუკმაპუროდ იყვნენ დარჩენილები პანდემიის დროს. მათ შემოუშვეს ახლა უკვე ლავროვის ოჯახის წევრები, რომლებიც არიან საერთაშორისოდ სანქცირებული პირები და რომლებისთვისაც დაკეტილია მთელი თავისუფალი სამყარო. ვინ იქნება შემდეგი ამ ხელისუფლების პირობებში, თავად ლავროვი? რომელიც არქიტექტორია 2008 წლის ომის, გენოციდის, ჩვენი მოქალაქეების დახოცვის, უკრაინის ომის და რომელიც ამბობს, რომ ის აღიარებს საქართველოს ტერიტორიული მთლიანობას აფხაზეთისა და ცხინვალის რეგიონის გარეშე. ვის ველოდოთ საქართველოში შემდეგს? ამ ხელისუფლების პირობებში არ არსებობს არანაირი გარანტია, რომ მომავალშიც არ შემოვლენ საქართველოს ტერიტორიაზე სანქცირებული პირები. ამიტომ, ჩვენ მოვითხოვთ დაუყოვნებლივ მოხდეს იმ კანონპროექტის განხილვა, რომელიც ჯერ კიდევ ერთი წლის წინ დააინიციირა „ერთიანმა ნაციონალურმა მოძრაობამ“, ჩვენ აღნიშნულ საკითხს დავაყენებთ დღეს ბიუროს სხდომაზე და ველით, რომ საქართველოს პარლამენტმა თავისი უფლებამოსილება განახორციელოს იმისთვის, რომ დაიცვას ქვეყნის ეროვნული ინტერესი და აკრძალოს სანქცირებული პირების შემოსვლა საქართველოს ტერიტორიაზე.“ - განაცხადა თინა ბოკუჩავამ.
პარტიის პოლიტსაბჭოს თავმჯდომარის ლევან ბეჟაშვილის განმარტებით, კანონპროექტი შეეხება ყველა ფიზიკურ და იურიდიულ პირს, რომლებიც ერთის მხრივ საქართველოს წინააღმდეგ ოკუპაციის არ აღიარების პოლიტიკას მისდევენ, ასევე უკრაინასთან მიმართებით ჩართულები არიან სამხედრო მრეწველობაში, არ აღიარებენ საქართველოს და უკრაინის ტერიტორიულ მთლიანობას
„განვმარტავ რამდენიმე იურიდიულ დეტალს, რომელიც ამ კანონპროექტით არის მოწესრიგებული. პირველი - კანონით დადგენილი შეზღუდვები გავრცელდება ყველა იმ ფიზიკურ და იურიდიულ პირზე, რომლის მხრიდანაც ხორციელდება საქართველოს და უკრაინის ტერიტორიების ოკუპაცია და სამხედრო აგრესია. ასევე იმ ფიზიკურ და იურიდიულ პირებს, რომლებიც ეთანამშრომრემლებიან ისეთ კომპანიებს, რომლებიც სანქცირებულები არიან და ამ შემთხვევაში საქართველოს ფიზიკურ და იურიდიულ პირებზეც გავრცელდება, თუ კი ისინი თანამშრომლობენ უცხო ქვეყნის, ამ შემთხვევაში რუსეთის ფიზიკურ და იურიდიულ პირებთან, რომლებიც სანქცირებულები არიან და რომლებიც ჩართულები არიან სამხედრო მრეწველობაში. ასევე ეკრძალებათ იმ ქართულ კომპანიებს და საერთაშორისო კომპანიებს, რომლებიც სანქცირებულთა სიაში არიან, საქართველოს სახელმწიფო ბიუჯეტიდან დაფინანსების მიღებაში და ტენდერებში მონაწილეობაში, რადგან ასეთი ფაქტები ამ ერთი წლის განმავლობაში საკმაოდ ბევრი დაფიქსირდა. ერთი სიტყვით, ეს კანონპროექტი ეხება ყველა ფიზიკურ და იურიდიულ პირს, რომელიც ერთის მხრივ საქართველოს წინააღმდეგ ოკუპაციის არ აღიარების პოლიტიკას მისდევენ იმ ქვეყნის წარმომადგენლები, ასევე უკრაინასთან მიმართებაში ჩართულები არიან სამხედრო მრეწველობაში, არ აღიარებენ საქართველოს და უკრაინის ტერიტორიულ მთლიანობას,“ - განაცხადა ლევან ბეჟაშვილმა.
დეპუტატ ანა წითლიძის განცხადებით, ნაციონალური მოძრაობის წარმომადგენლები შეხვდებიან საერთაშორისო პარტნიორებს“, საელჩოებს, რათა გააცნონ საკანონმდებლო ინიციატივა.
„წელიწადზე მეტია უკვე „ქართულ ოცნებას“ თაროზე აქვს შემოდებული ჩვენი ეს საკანონმდებლო ინიციატივა მაშინ, როდესაც დაჩქარებული წესით გააქვს ის კანონპროექტი, რომელიც მისთვის არის სასურველი. ამიტომაც, ჩვენ გარდა იმისა, რომ მოვითხოვთ ეს კანონპროექტი განიხილონ, ასევე ჩვენ შევხვდებით ჩვენს საერთაშორისო პარტნიორებს, კომუნიკაცია გვექნება დიპლომატიურ წარმომადგენლებთან, საელჩოებთან, რომ გავაცნოთ ჩვენი საკანონმდებლო ინიციატივა და ასევე მოვუყვეთ როგორ აფერხებს „ქართული ოცნება“ ამ საკანონმდებლო ინიციატივის განხილვას.“ - განაცხადა „ერთიანი ნაციონალური მოძრაობის“ დეპუტატმა, ანა წითლიძემ.
