უკრაინის პრეზიდენტი ვოლოდიმირ ზელენსკი არაბული ქვეყნების ლიგის სამიტზე სიტყვით გამოვიდა. მან არაბული ქვეყნების ლიდერებს მოუწოდა რუსული გავლენის მიუხედავად, მხარი დაუჭირონ უკრაინას რუსეთის აგრესიის წინააღმდეგ ბრძოლაში.
უკრაინის პრეზიდენტმა შეახსენა არაბ ლიდერებს საუდის არაბეთის როლის შესახებ, რომელიც ამ სახელმწიფომ უკრაინელი ტყვეების გათავისუფლებაში შეიტანა.
ზელენსკიმ ასევე თქვა, მიუხედავად იმისა, რომ სამიტზე იმყოფებიან ადამიანები, რომლებიც სხვადასხვაგვარად აფასებენ უკრაინაში მიმდინარე ომს და მას „კონფლიქტს“ უწოდებენ, მათ მაინც შეუძლიათ გაერთიანება რუსეთის ტყვეობიდან ადამიანების გათავისუფლების იდეის გარშემო.
„სამწუხაროდ მოფლიოში და აქაც თქვენს შორის არიან ადამიანები, ვინც თვალს ხუჭავს უკანონო ანექსიაზე. მე აქ ვარ, რათა თითოეულმა თქვენგანმა სამართლიანად შეხედოს {მიმდინარე მოვლენებს} , - რუსები როგორც არ უნდა ცდილობდნენ გავლენა მოახდინონ {სხვა ქვეყნების პოლიტიკოსებზე}, დამოუკიდებლობის შენარჩუნება მნიშვნელოვანია“, - განაცხადა ზელენსკიმ.
ვოლოდიმირ ზელენსკი ჯედაში ყოფნისას უკვე შეხვდა საუდის არაბეთის პრინცს, მუჰამედ ბინ სალმანს.
არაბული ქვეყნების ლიდერების სამიტს ჯედაში ასევე ესწრება სირიის პრეზიდენტი ბაშარ ასადი.
