დღეს არის უმძიმესი დღე საქართველოში, „ქართული ოცნება“ გადავიდა საქართველოს პირდაპირი რუსიფიკაციის გზაზე, – ამის შესახებ „სტრატეგია აღმაშენებლის“ ლიდერმა, გიორგი ვაშაძემ განაცხადა.
„ვფიქრობ, ამ დროს არცერთ მოქალაქეს არ გვაქვს უფლება, ეს უბრალოდ გავატაროთ, ვისხდეთ სახლში. მოძალადე რუსულ რეჟიმს უბრალოდ თავი დავუხაროთ და ისე გავაკეთოთ ეს, თითქოს არაფერია. მთელი მსოფლიოს ყურადღება ახლა მოპყრობილია თბილისზე, მთელი მსოფლიო ელოდება ქართველი ხალხის პასუხს ამ მავნებლობაზე, საძაგლობაზე, ღალატის ანატომიაზე, რომელსაც ახლა ჩადის „ქართული ოცნება“, ამიტომ ყველანი ერთად უნდა შევიკრიბოთ რუსთაველზე დღეს, ხვალ და მუდმივად, როგორც რუსული კანონი არ გავატანინეთ ამ პარლამენტიდან, ვიდრე ისევ არ შეწყდება ფრენები რუსეთის ფედერაციასთან. ვალერი კვარაცხელიაც კი გამოიყვანეს, ადამიანი, რომელიც არის სიმბოლო რუსეთის ინტერესების გატარების საქართველოში ბნელ 90-იანებში. ადამიანი, რომელიც არ აღიარებს, რომ საქართველოს ტერიტორიები არის ოკუპირებული, მას არაფერი ესაქმება საქართველოში. ყველა, ვინც ჩამოდის საქართველოში, მან ხელი უნდა მოაწეროს ტერიტორიულ მთლიანობას უპირველესად და შემდეგ ჰქონდეს საქართველოში შემოსვლის უფლება.
საღამოს 7-ზე თუ 8-ზე, როცა იტყვით, გელოდებით რუსთაველზე, არა რომელიმე პარტიისთვის ან პოლიტიკოსისთვის, ან ვინმეს განცხადებისთვის, არამედ თქვენთვის, თქვენი შვილებისთვის, ჩვენი ქვეყნის მომავლისთვის. ყველა, ვინც ვემსახურებით სამშობლოს, ყველანი უნდა გამოვიდეთ, ყველანი ერთად უნდა დავდგეთ – არა რუსულ ფრენებს, არა რუსიფიკაციას, არა რუსეთს საქართველოში, არა რუსულ რეჟიმს და დიდება ძლიერ, ერთიან საქართველოს, ეს არის ჩვენი ამოცანა“, – განაცხადა ვაშაძემ.
