უკრაინის შეიარაღებულმა ძალებმა ბახმუტთან, სხვადასხვა მონაკვეთზე კიდევ 150-1700 მეტრით წინ წაიწიეს. ამის შესახებ უკრაინის ჯარების აღმოსავლეთ დაჯგუფების წარმომადგენელმა სერჰი ჩერევატიმ განაცხადა.
„ბრძოლების მსვლელობისას ჩვენი ქვედანაყოფები, იმის მიუხედავად, რომ პირადი შემადგენლობის, ჭურვებისა და ტექნიკის მხრივ უპირატესობა არ აქვთ, ფლანგებზე წინსვლას აგრძელებენ. გასული დღე-ღამის განმავლობაში 150-1700 მეტრით წინ წაიწიეს“, - განაცხადა მან.
უკრაინის შეიარაღებული ძალების განცხადება დაადასტურა დაჯგუფება „ვაგნერის“ ხემძღვანელმა ევგენი პრიგოჟინმაც.
„სამწუხაროდ, რუსეთის თავდაცვის სამინისტროს ქვედანაყოფებმა ბახმუტის ჩრდილოეთით 570 მეტრამდე უკან დაიხიეს და ჩვენი ფლანგები დათმეს. საჯაროდ მივმართავ თავდაცვის სამინისტროს უმაღლეს ხელმძღვანელობას, რადგან ჩემს წერილებს არ კითხულობენ. გთხოვთ, ვალერი გერასიმოვ, სერგეი შოიგუ, არ დათმოთ ჩვენი ფლანგები, არ დათმოთ დასახლებული პუნქტები საკო და ვანცეტი, კიდევ რამდენიმე დღეს გაუძელით, როგორც შეგიძლიათ გააკეთთ ყველაფერი, რაც თქვენზეა დამოკიდებული, რათა ფლანგები არ დაიშალოს“, - განაცხადა პრიგოჟინმა.
ამასთან, გუშინ საღამოს პრიგოჟინი იუწყებოდა, რომ მისმა დაქირავებულმა მებრძოლებმა ბახმუტში 260 მეტრით წაიწიეს წინ. მან ისევ დაადანაშაულა რუსული ქვედანაყოფები ფლანგების დატოვებაში, მაგრამ პირობა დადო, რომ ბახმუტს აიღებენ.
