გასული ღამის განმავლობაში უკრაინის ძალებმა რუსი ოკუპანტების მიერ გაშვებული 21 დრონიდან 17 ჩამოაგდეს. უკრაინის საჰაერო ძალების განცხადებით, მტერი უკრაინას თავს „შაჰედი 136/131“-ის ტიპის კამიკაძე-დრონებით დაესხა.
მათივე ინფორმაციით, საზენიტო-სარაკეტო დანადგარებით, გამანადგურებლებითა და მობილური საცეცხლე ჯგუფების გამოყენებით განადგურებულია მტრის 17 სამიზნე. ხმელნიცკის ოლქში თავდასხმის შედეგად დაზიანდა ინფრასტრუქტურის ობიექტები.
კიევის სამხედრო ადმინისტრაციის ხელმძღვანელის სერჰი პოპკოს ინფორმაციით, უკრაინის საჰაერო ძალებმა კიევის წინააღმდეგ გაშვებული ყველა “შაჰედის“ დრონი ჩამოაგდეს. მისივე ცნობით, თავდასხმას ნგრევა და მსხვერპლი არ მოჰყოლია, ასევე არ არიან დაშავებულები.
