გენდერული თანასწორობის მუდმივმოქმედი საბჭოს თავმჯდომარე ნინო წილოსანი და ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მიხეილ სარჯველაძე დემოკრატიული და სამართლიანი საერთაშორისო წესრიგის ხელშეწყობის საკითხებში გაეროს დამოუკიდებელ ექსპერტს, ლივინგსტონ სევანიანას შეხვდნენ.
შეხვედრაზე საქართველოში ადამიანის უფლებათა დაცვის სტანდარტებსა და გენდერულ თანასწორობასთან დაკავშირებულ საკითხებზე ისაუბრეს.
„ვისაუბრეთ საქართველოში მიმდინარე საკითხებზე, რომელიც მნიშვნელოვანია დემოკრატიული სტანდარტების შეფასებებისთვის. ეს შეეხებოდა ცალკეულ ადამიანთა უფლებრივ მდგომარეობას, იმ სტანდარტებს, რომლითაც იზომება საზოგადოების დემოკრატიულობის ხარისხი. საინტერესო იყო ის საკითხები, რომლითაც სტუმარი დაინტერესდა. შესაძლებლობა გვქონდა მიგვეწოდებინა ინფორმაცია ყველა იმ საკითხზე, რომელიც საერთაშორისო მედიის ყურადღების ცენტრში მოქცეულა სხვადასხვა დროს და საქართველოზე შთაბეჭდილების შექმნის შესაძლებლობას ქმნის“, - განაცხადა მიხეილ სარჯველაძემ.
ნინო წილოსანის განცხადებით, ექსპერტს გადაეგზავნა დოკუმენტური მასალა, რომელშიც ობიექტურადაა ასახული ინფორმაცია საქართველოში არსებულ მდგომარეობაზე როგორც ადამიანის უფლებებთან, ასევე გენდერულ საკითხებთან დაკავშირებით.
„იმედი გვაქვს, მისი ანგარიში იქნება ობიექტური“, - განაცხადა ნინო წილოსანმა.
