„ძალიან სამწუხაროა, რომ „ ქართული ოცნება“ იმეორებს კრემლის პროპაგანდას, რომ საქართველომ დაიწყო ომი. ეს არის ძალიან მძიმე და საქართველოს ეროვნული ინტერესების საზიანო, რადგან თქვენი პოლიტიკური ძალისთვის საქართველოს ეროვნული ინტერესები არც არასდროს ყოფილა განსაკუთრებული მნიშვნელობის მატარებელი, თქვენთვის ყველაზე მნიშვნელოვანი იყო პარტიული ინტერესი და იმ ადამიანის ინტერესი, ვისაც ნამდვილად არაფერი საერთო არ აქვს უსაფრთხოებასთან და ეროვნულ ინტერესთან“ , - მიმართა საპარლამენტო უმრავლესობას ოპოზიციის წარმომადგენელმა ხატია დეკანოიძემ პარლამენტის პლენარულ სხდომაზე.
მისი თქმით, სამწუხაროა, რომ 24 თებერვლის შემდეგ ისევ ისმის განცხადებები საქართველოს მიერ 2008 წლის აგვისტოს ომის დაწყებასთან დაკავშირებით.
„ძალიან სამწუხაროა, რომ ამ დარბაზში ჰააგის სასამართლოს განაჩენის გამოტანის შემდეგ კიდევ ისმის, რომ საქართველომ დაიწყო ომი“, - განაცხადა ხატია დეკანოიძემ.
