რუსეთის სარაკეტო იერიშს სლავიანსკში 5 ადამიანი ემსხვერპლა, დაშავდა კიდევ 15. დონეცკის საოლქო სამხედრო ადმინისტრაციის ხელმძღვანელის პაველ კირილენკოს განცხადებით, მტერმა, სავარაუდოდ, С-300 ტიპის რაკეტები გამოიყენა.
მისივე თქმით, დაზიანებულია 5 მრავალსართულიანი და 5 კერძო სახლი, მაღაზია, სამეურნეო ცენტრი, კლუბი და 3 ავტომობილი.
რუსეთის სასტიკ დაბომბვას Telegram-ზე გამოეხმაურა უკრაინის პრეზიდენტი ვოლოდიმირ ზელენსკი. მან ემოციები ვერ შეიკავა და აღნიშნა, რომ ტერორისტი სახელმწიფო სამართლიან სასჯელს მიიღებს.
„ბოროტმა სახელმწიფომ მორიგ ჯერზე აჩვენა თავისი არსი. დღისით ადამიანების მოკვლით, სიცოცხლის განადგურებითა და დანგრევით. ტერორიზმის ყოველი გამოვლინებისთვის დადგება სამართლიანი პასუხისმგებლობა. რუსეთის არც ერთი კვალი ჩვენს მიწაზე არ დარჩება. არც ერთი მტერი დაუსჯელი არ დარჩება“, - დაწერა ზელენსკიმ.
