პარლამენტის თავმჯდომარის შალვა პაპუაშვილის თქმით, პენიტენციურ დაწესებულებაში შესვლა და მონახულება არ არის დეპუტატის უფლება, ეს არის პარლამენტის თავმჯდომარის უფლება და თავმჯდომარეს შეუძლია ამ უფლების პარლამენტარზე დელეგირება.
სამწუხაროდ, დეპუტატები ამ უფლებით გადაჭარბებულად სარგებლობენ
„პენიტენციურ დაწესებულებაში შესვლა და მონახულება არ გახლავთ დეპუტატის უფლება, ეს გახლავთ პარლამენტის თავმჯდომარის უფლება, რომლის დელეგირებაც მას შეუძლია პარლამენტის წევრზე.
სამწუხაროდ პარლამენტის წევრები ამ უფლებით გადაჭარბებულად სარგებლობენ. რაც ცდება ხოლმე იმ ზღვარს, რომელიც განსაზღვრულია უფლებებთან დაკავშირებით ან სხვა მხრივ ინტერესთან მონახულების“,-ამის შესახებ საქართველოს პარლამენტის თავმჯდომარე შალვა პაპუაშვილმა პარლამენტის პლენარულ სხდომაზე ოპოზიციონერი დეპუტატების საპასუხოდ განაცხადა, რომელთაც აღნიშნეს, რომ არ მიეცათ საპატიმროში ლაზარე გრიგორიადისის მონახულების საშუალება.
შალვა პაპუაშვილის განმარტებით, კონკრეტულ შემთხვევაში დაკავებულ პირთან მიმართებით, დამატებითი უფლებრივი საჭიროება ჩარევისა და მონახულების არ არსებობს. და არსებობს საკითხის პოლიტიზირების საფრთხე.
„ამ კონკრეტულ შემთხვევას რაც შეეხება, იცით, რომ სახალხო დამცველის წარმომადგენელმა მოინახულა ეს კონკრეტული ბრალდებული პირი, მისი ადვოკატი შეუფერხებლად შედის და ყველაფერი საჯაროა და არ მგონია, არსებობს დამატებითი უფლებრივი მხრივ ჩარევის და მონახულების საჭიროება.
მეორეს მხრივ, კი ვხედავ საფრთხეს მოხდეს ამ საკითხის პოლიტიზირება და თქვენ გამოსვლას სწორედ ეს შინაარსი აქვს, - გინდათ აქ პოლიტიკური ასპექტი ჩადოთ, - ეს არის სწორედ საფრთხე, მათ შორის, მართლმსაჯულებისთვის.
რაც შეეხება თავად საკითხს, ბრალდება წარდგენილია და ამის მიხედვით იმსჯელებს თავად სასამართლო“,-განაცხადა შალვა პაპუაშვილმა.
პარტია „ლელოს“ წევრის, ანა ნაცვლიშვილის განცხადებით, 7-9 მარტის აქციების მონაწილე ლაზარე გრიგორიადისის ციხეში მონახულებაზე პარლამენტის თავმჯდომარემ უარი უთხრა.
