აშშ-ის სახელმწიფო მდივან ენტონი ბლინკენსა და რუსეთის საგარეო საქმეთა მინისტრ სერგეი ლავროვს შორის სატელეფონო საუბარი შედგა. ბლინკენსა და ლავროვს შორის სატელეფონო კომუნიკაცია 2022 წლის ივლისის შემდეგ არ შემდგარა.
მოსკოვის განცხადებით, ბლინკენმა და ლავროვმა ისაუბრეს რუსეთში ამერიკული გამოცემა The Wall Street Journal-ის ჟურნალისტის ევან გერშკოვიჩის უკანონო დაკავების შესახებ, რომელიც რუსული მხარის მიერ ჯაშუშობაშია ბრალდებული.
როგორც რუსეთის საგარეო საქმეთა სამინისტროს განცხადებაშია ნათქვამი, ლავროვმა ბლინკენს უთხრა, რომ გერშკოვიჩი დაკავებულია „საიდუმლო ცნობების მიღების მცდელობისთვის“, ლავროვის თქმით, „ის ახორციელებდა ჟურნალისტის სტატუსის საფარქვეშ მონაცემების შეგროვებას, რომლებიც შეიცავდა სახელმწიფო საიდუმლოებას“.
„საუბარი შეეხო ასევე ორმხრივი შინაარსის ზოგიერთ აქტუალურ საკითხს“, - აღნიშნეს რუსეთის საგარეო უწყებაში, თუმცა არ უთქვამთ, კონკრეტულად რას ეხებოდა აღნიშნული საუბარი.
აშშ-ის სახელმწიფო დეპარტამენტში დაადასტურეს ბლინკენისა და ლავროვის სატელეფონო საუბარი და აღნიშნეს, რომ ენტონი ბლინკენმა კრემლს მოუწოდა დაუყოვნებლივ გაათავისუფლოს გერშკოვიჩი და უკანონოდ დაკავებული აშშ-ის მოქალაქე პოლ ვილანი. „სახელმწიფო მდივანმა და საგარეო საქმეთა მინისტრმა ლავროვმა ასევე ისაუბრეს იმ პირობების შექმნის აუცილებლობაზე, რომლებიც დიპლომატიურ მისიებს შესაძლებლობას მისცემს შეასრულონ თავიანთი სამუშაო“, - აღნიშნეს სახელმწიფო დეპარტამენტში.
