ევროკავშირის საგარეო საქმეთა და უსაფრთხოების პოლიტიკის საკითხებში უმაღლესმა წარმომადგენელმა, ჟოზეფ ბორელმა რუსეთისთვის გაეროს უშიშროების საბჭოს თავმჯდომარეობის გადაცემას პირველი აპრილისთვის {ხუმრობის დღისთვის} შესაფერისი უწოდა. მისი თქმით, ევროკავშირი ყველა ზომას გამოიყენებს, რომ რუსეთმა გაეროს უშიშროების საბჭოს თავმჯდომარეობა ბოროტად არ გამოიყენოს.
„რუსეთი იბარებს გაეროს უშიშროების საბჭოს თავმჯდომარეობას, ეს ზუსტად პირველი აპრილის შესაფერისია.
იმის მიუხედავად, რომ რუსეთი უშიშროების საბჭოს მუდმივმოქმედი წევრია, ის მუდმივად არღვევს გაეროს სამართლებრივ საფუძვლის არსს.
ევროკავშირი არ დაუშვებს რუსეთის მხრიდან {თავმჯდომარეობის} ბოროტად გამოყენებას, მისი თავმჯდომარეობის პერიოდში“, - წერს ბორელი.
1-ლი აპრილიდან ერთი თვის განმავლობაში რუსეთი გაეროს უშიშროების საბჭოს უხელმძღვანელებს.
უშიშროების საბჭოს თავმჯდომარეობას რუსეთი როტაციის პრინციპით გადაეცა. გაეროს უშიშროების საბჭოს თავმჯდომარე ქვეყნები ყოველთვიურად იცვლებიან. მათი თანმიმდევრობა ანბანის მიხედვით განისაზღვრება. საბჭოს თავმჯდომარე ქვეყანა ნიშნავს და ხსნის შეხვედრებს, მაგრამ არ აქვს უფლებამოსილება, გავლენა მოახდინოს საბჭოს გადაწყვეტილებებზე.
