კიევის სასამართლომ მოსკოვის საპატრიარქოს დაქვემდებარებული უკრაინის მართლმადიდებლური ეკლესიის მიტროპოლიტ პაველ ლებედს ორთვიანი შინა პატიმრობა შეუფარდა.
ინფორაციას უკრაინული მედია თავის წყაროებზე დაყრდნობით ავრცელებს.
მიტროპოლიტ პაველს ორთვიან შინა პატიმრობასთან ერთად ელექტრონული სამაჯურის ტარებაც მიესაჯა. თუმცა სასამართლომ მას ღვთისმსახურების ჩატარებისა და მრევლთან ურთიერთობის ნება დართო.
დღეს, კიევ-პეჩერის ლავრის ყოფილი წინამძღვარი, მიტროპოლიტი პაველ ლებედი დაკითხვაზე დაიბარეს.
მიტროპოლიტის სახლსა და ლავრაში ჩხრეკა ჩატარდა.
მას ბრალი ედება რელიგიური სიძულვილის გაღვივებაში, ასევე უკრაინის წინააღმდეგ რუსეთის შეიარაღებული ძალების აგრესიის გამართლებაში.
პაველ ლებედმა სასამართლო დარბაზში განაცხადა, რომ ის აგრესიის წინააღმდეგია, თუმცა რუსეთი არ უხსენებია.
„არაფერი გამიკეთებია ისეთი, რომ ბრალი დამდონ. ეს პოლიტიკური საქმეა. არასდროს ვყოფილვარ აგრესიის მხარეს, აგრესიის წინააღმდეგი ვარ. ახლა უკრაინაში ვიმყოფები. ეს ჩემი მიწაა“, – განაცხადა მიტროპოლიტმა სასამართლოს დარბაზში.
ამასთან, უკრაინის უსაფრთხოების სამსახურმა საუბრის ჩანაწერები გამოაქვეყნა, რომელშიც მიტროპოლიტი პაველი დადებითად საუბრობს რუსი სამხედროების მიერ ხერსონის ოკუპაციის შესახებ და პატრიარქ კირილისთვის ლოცვას სთხოვს.
