„სტრატეგია აღმაშენებლის“ ლიდერი გიორგი ვაშაძე მარტის აქციაზე პოლიციელზე თავდასხმისა და ნივთის დაზიანების ფაქტებთან დაკავშირებით გუშინ დაკავებული პირის შესახებ აცხადებს, რომ მისი პარტიის წევრი არ არის.
თუმცა მისივე თქმით, დაიცავენ და გვერდში დაუდგებიან თითოეულ მოქალაქეს, ვისზეც სურს ხელის შეწმნედა „ქართულ ოცნებას“.
„ძალადობაზე პასუხისმგებლობა თავიდან ბოლომდე ეკისრება „ქართულ ოცნებას“ და იმ სამართალდამცავ ორგანოებს, რომლებიც პოლიტიკური დავალებით თავს დაესხნენ მშვიდობიან მანიფესტანტებს და მომიტინგეებს. რაც შეეხება ამ კონკრეტულ შემთხვევას, ჩვენ აუცილებლად დავუკავშირდებით ოჯახსაც. პირველი – ჩვენი პარტიის წევრი არ არის ეს ადამიანი, მაგრამ ეს არ ნიშნავს, რომ ჩვენ არ დავიცავთ თითოეულ მოქალაქეს, ვისზეც უნდა ხელის შეწმენდა „ქართულ ოცნებას“, ამის შესაძლებლობას არ მივცემთ. აუცილებლად გვერდში დავუდგებით“, – აღნიშნა გიორგი ვაშაძემ.
ამასთან, ვაშაძემ პარტია „ქართული ოცნების“ თავმჯდომარის, ირაკლი კობახიძის განცხადებას უპასუხა: „სჯობს, ბოლშევიზმზე თავის თავზე ილაპარაკოს, რადგან ბოლშევიზმი მოდიოდა მოსკოვიდან, ისევე როგორც მოსკოვიდან მოდის დავალებები, რომლებსაც ასრულებენ კობახიძე და თავისი თანაგუნდელები“.
ირაკლი კობახიძემ განაცხადა, რომ „ბოლშევიკური „ტროიკა“, ვაშაძე-ჯაფარიძე-ხოშტარიას ერთობა არის აგენტების ერთობლიობა, გუშინ დაკავებული პირი მოქმედებდა კონკრეტული ინტერესით, რომ მათი დაფინანსება არ ყოფილიყო გამჭვირვალე“.