ფინეთის პრეზიდენტმა საული ნიინისტომ ხელი მოაწერა კანონს ქვეყნის ნატო-ში გაწევრიანების შესახებ. ეს ეროვნულ დონეზე რატიფიკაციის საბოლოო პროცესია, რომელიც აუცილებელია ქვეყნის ნატო-ში გაწევრიანებისთვის.
პირველ მარტს ჩრდილოატლანტიკურ ალიანსში გაწევრიანების გადაწყვეტილება ფინეთის პარლამენტმა დაამტკიცა. დოკუმენტს მხარი 184-მა დეპუტატმა დაუჭირა, შვიდმა კი წინააღმდეგ მისცა ხმა. სხდომაზე პარლამენტის კიდევ შვიდი წარმომადგენელი არ იმყოფებოდა, ერთმა თავი შეიკავა.
ნატო-ში გაწევრიანებაზე ფინეთის განაცხადის რატიფიცირება ალიანსის წევრი 30 -დან 28 ქვეყანამ უკვე განახორციელა. ჩრდილოატლანტიკურ ალიანსში ქვეყნის გაწევრიანება მას შემდეგ გახდება შესაძლებელი, რაც რატიფიცირების პროცესს უნგრეთი და თურქეთი დაასრულებენ.