„მთელი პრობლემა იმაში მდგომარეობს, რომ ჩვენს კოლეგებს როგორც უმრავლესობიდან, ასევე ოპოზიციიდან, არ უნდათ პოლიტიკოსობა. ამ დარბაზში, წესით, პოლიტიკოსები უნდა ვისხდეთ და პოლიტიკურ საქმეებს განვიხილავდეთ“, - განაცხადა საპარლამენტო პოლიტიკური ჯგუფი „გირჩის“ თავმჯდომარემ იაგო ხვიჩიამ პარლამენტის პლენარულ სხდომაზე.
მისი თქმით, საქართველოს დამოუკიდებლობის აღდგენის შემდეგ არასდროს ყოფილა პრორუსული ხელისუფლება, რომელიც თვითონ აღიარებდა, რომ პრორუსული იყო.
„საქართველოში ყოველთვის ვლანძღავდით ერთმანეთს მიმართვებით: შე პრორუსო, შე კაგებეს აგენტო და ა. შ. და უცებ, ერთ დღეში გაირკვა, რომ პრორუსობა, თურმე, არც ისეთი დიდი პრობლემაა და შეიძლება მთელმა სამყარომ გვითხრას, რომ პრორუსულია ეს კანონი, მაგრამ მხარი მაინც დავუჭიროთ. დღეს საქართველოს მთავრობა ყველაზე ცუდად გამოიყურება მორალურად. სახელისუფლებო გუნდმა ერთ დღეს პრორუსულ კანონს მხარი დაუჭირა, მეორე დღეს კი უკან წაიღო. ფეხბურთის ენაზე რომ ვთქვათ, „ქართულმა ოცნებამ“ მყესები დაიწყვიტა არაფრისგან და რატომ არ ცდილობს „ნაცმოძრაობა“ გოლის გატანას, სად არიან ახლა, ამ დროს? სწორედ ეს მიმყარებს მოსაზრებას, რომ ყველა ესენი შეთანხმებულები არიან“, -განაცხადა იაგო ხვიჩიამ.
