რუსული სამთავრობო მედია ამტკიცებს, რომ ვლადიმირ პუტინი ოკუპირებულ მარიუპოლში ვერტმფრენით ჩაფრინდა. პროპაგანდისტული მედია ავრცელებს კადრებს, სადაც ჩანს პუტინი და რუსეთის ვიცე-პრემიერი მარატ ხუსნულინი.
„რია ნოვოსტის“ მიერ გამოქვეყნებული ვიდეოს პირველ ნაწილში ჩანს პუტინი, რომელიც მართავს ავტომობილს, მარატ ხუსნულინი კი ზის წინა სავარძელში და მას მოსახლეობისა და ბიზნესმენების „დახმარების“ შესახებ უყვება. მანქანის ფანჯრის მიღმა სიბნელეა და ვიდეოში სხვა არაფერი ჩანს.
ვიდეოს მეორე ნაწილში პუტინი და ხუსნულინი ათვალიერებენ შენობას. „რია ნოვოსტი“ ამტკიცებს, რომ ეს ფილარმონიის შენობაა. პუტინი ჯდება მაყურებელთა დარბაზის სავარძელში და ამბობს: „კომფორტულია, ლამაზია“. ამით ვიდეო მთავრდება.
შეგახსენებთ, გუშინ,18 მარტს გავრცელდა ინფორმაცია, რომ ჰააგის სასამართლოს მიერ ძებნილი, ომის დამნაშავე რუსი დიქტატორი ვლადიმირ პუტინი ანექსირებულ ყირიმში ჩავიდა.
