თეთრი სახლის ეროვნული უსაფრთხოების საბჭოს სტრატეგიული კომუნიკაციების ხელმძღვანელმა, ჯონ კირბიმ CNN-ის ეთერში განაცხადა, რომ აშშ-მა მიიღო ზომები, რათა შავ ზღვაში ჩავარდნილი დრონი MQ-9 Reaper უცხო ხელში არ მოხვდეს.
„რა თქმა უნდა ჩვენს ინტერესში არ არის, რომ იქამდე ჩვენს გარდა სხვამ მიაღწიოს“, - განაცხადა კირბიმ.
მანამდე პენტაგონის წარმომადგენელმა პატრიკ რეიდერმა განაცხადა, რომ დრონი რუსი სამხედროების ხელში არ მოხვედრილა.
აშშ-მა გუშინ, 14 მარტს განაცხადა, რომ უპილოტო საფრენ აპარატს MQ-9 Reaper-ს რუსული გამანადგურებელი სუ-27 შავი ზღვის თავზე ნეიტრალურ სივრცეში დაეჯახა, რის შემდეგაც დრონი ზღვაში ჩავარდა. რუსეთის თავდაცვის სამინისტრო დაჯახების ფაქტს უარყოფს და ამბობს, რომ დრონი გამორთული ტრანსპონდერებით ანექსირებული ყირიმისკენ მიფრინავდა.
